जळगाव (प्रतिनिधी) गुंतवणुकीवर मिळालेल्या नफ्यातील २० टक्के रक्कम संस्थेला दान करण्याच्या नावाखाली एकाची ५३ लाख ६५ हजारांची ऑनलाईन फसवणुक केली होती. ही रक्कम डोनेशनच्या बहाण्याने स्विकारुन ते समाजकार्यासाठी वापरल्याचे दाखविणाऱ्या कांजीभाई भिकाभाई जादव (वय ४२, रा. वेरावल, जि. गिर सोमनाथ, गुजरात) याला सायबर पोलिसांनी अटक केली. आतापर्यंत या गुन्ह्यात ११ लाख ८३ हजार रुपये जप्त करण्यात आले असल्याची माहिती पोलीस अधीक्षक डॉ. महेश्वर रेड्डी यांनी पत्रकार परिषदे दिली.
तक्रारदार यांना दि. १० जून २०२४ ते दि. ३१ जुलै २०२४ दरम्यान त्यांना व्हॉट्सअॅपवर अमीत मालविया, आदित्य जैन, विजय कुमार असे नाव सांगण्यांनी वेगवेगळ्या क्रमांकावरुन संपर्क साधला. त्यांना राईज प्यारामीड एलिट प्रकल्प योजनेत सामील होण्यासाठी गुंतवणुक करण्याचे अमिष दाखवून त्यांना मोठ्या प्रमाणात नफा कमावून दिला. त्यानंतर धर्मदार अधिक चांगल्या प्रकारे विकसीत करण्यास मदत करण्यासाठी गुंतवणुकदारांनी त्या नफ्यातील २० टक्के रक्कम त्यांच्या धन सिक्युरिटीज धर्मदार संस्थेला दान करावे असे खोटे सांगितले. त्यानुसार तक्रारदाराकडून त्यांनी वेळोवेळी ५३ लाख ६५ हजारांची रक्कम ऑनलाईन स्विकारुन त्यांनी फसवणुक केल्याप्रकरणी सायबर पोलिसात गुन्हा दाखल करण्यात आला आहे.
गुजरात मधून आवळल्या संशयिताच्या मुसक्या या गुनह्याचा तपास करीत असतांना सायबर पोलीस ठाण्याचेपोलीस निरीक्षक सतिष गोराडे यांनी त्यांचे अधिनस्त उपनिरीक्षक दिगंबर थोरात, पोहेकॉ दिलीप चिंचोले, हारुण पिंजारी यांच्या पथकाने या गुन्ह्याचा तपास केला. या तपासात त्यांनी गुजरात येथून कांजीभाई जादव या संशयिताला ताब्यात घेतले. या गुन्ह्यात आतापर्यंत ७ संशयितांना निष्पन्न केले असून तीन जणांना अटक केली आहे.
