मुंबई (वृत्तसंस्था) मी ससून रुग्णालयातून पळालो नाही, मला पळवलं गेलं, यामध्ये कोणाकोणाचा हात आहे मी सगळं सांगणार, असं खळबळजनक गौप्यस्फोट ड्रग माफिया ललित पाटीलनं केला आहे.
ससून रुग्णालयातून पोलिसांच्या हातावर तुरी देऊन पळालेला ड्रग माफिया ललित पाटीलला मुंबई पोलिसांनी अटक केली असून त्याला अंधेरी न्यायालयात हजर करण्यात येणार आहे. साकीनाका पोलीस स्थानकातून वैद्यकीय तपासणीसाठी जात असताना जेरबंद ललित पाटील माझाच्या कॅमेऱ्यात कैद झाला. साकीनाका पोलीस स्थानकातून वैद्यकीय तपासणीसाठी रुग्णालयाच्या दिशेनं जात असताना, मी पत्रकारांशी लवकरच बोलीन, असं ललित पाटील म्हणाला. त्यानंतर अंधेरी न्यायालयात पोहोचल्यानंतर मी ससून रुग्णालयातून पळालो नाही, मला पळवलं गेलं, यामध्ये कोणाकोणाचा हात आहे मी सगळं सांगणार, असे सांगितले. पोलिसांपासून आपल्या जीवाला धोका असल्याचंही ललित पाटील याने म्हटलं आहे.
ससुन रुग्णालयातून पळ काढल्यानंतर ललित पाटील अनेक दिवस नाशिकमध्येच होता. नाशिक पोलीस, पुणे पोलीस तसेच मुंबई पोलीस मागावर असताना देखील ललित पाटील नाशिकमध्येच कसा? त्याला कोणाचा राजकीय पाठींबा होता का? तपास यंत्रणांच्या शोध कार्याला गती येताच ललित पाटीलनं नाशिकमधून पळ काढला. त्यानंतर इंदोरला गेला, तिथून तो सूरतमध्ये गेला आणि पुन्हा नाशिक धुळे औरंगाबाद करत कर्नाटकात प्रवेश केला. बंगळूरवरून चेन्नईला जात असताना साकीनाका पोलिसांनी ललित पाटीलला अटक केली. चेन्नईवरुन ललित श्रीलंकेला जाणार होता, अशी माहिती मिळत आहे.
तर दुसरीकडे ललित पाटील याच्या आईवडिलांनी आपल्या मुलाचा एन्काऊंटर होण्याची भीती व्यक्त केली आहे. या दोघांनी एका मराठी वृत्तवाहिनीला दिलेल्या मुलाखतीत, ‘आमच्या मुलावर कारवाई करा, पण त्याचा एन्काऊंटर करु नका’, अशी आर्त मागणी केली.
दरम्यान, ललित पाटील याला जोगेश्वरी (पूर्व) येथील बाळासाहेब ठाकरे रुग्णालयात (ट्रामा केयर सेंटर) वैद्यकीय तपासणीसाठी आणण्यात आले. मुंबई पोलिसांचे अनेक वरिष्ठ अधिकारी रुग्णालयाच्या आवारात हजर होते. या रुग्णालयातून त्याला अंधेरी न्यायालयात हजर करण्यात आले. न्यायालयाने त्याला सोमवारपर्यंत पोलिस काेठडी सुनावली आहे.
