चिपळूण (वृत्तसंस्था) माझ्याविरुद्ध गुन्हा दाखल झाल्याची माहिती नाही. मी कोणताही गुन्हा केलेला नाही. तसेच मी शिवसैनिकांना भीक घालत नाही. त्यांनी समोर उभं राहावं, अशी प्रतिक्रिया गुन्हा दाखल झाल्यानंतर केंद्रीय मंत्री नारायण राणे यांनी दिली आहे.
मुख्यमंत्री उद्धव ठाकरे यांच्याविरुद्ध आक्षेपार्ह वक्तव्य केल्याप्रकरणी शिवसेनेचे सुधाकर बडगुजर यांनी नाशकात सायबर पोलीस स्टेशनमध्ये तक्रार केली. सामाजिक तेढ निर्माण होऊन कायदा व शांतता बाधित होईल असे चिथावणी देणारे वक्तव्य दिले म्हणून गुन्हा दाखल करण्यात आला. यावर प्रतिक्रिया देतांना राणे म्हणाले की, माझ्याविरुद्ध गुन्हा दाखल झाल्याची माहिती नाही. मी कोणताही गुन्हा केलेला नाही. माझी बदनामी करायला घेतली तर तुमच्याविरोधात गुन्हा दाखल होईल, आमचंही केंद्रात सरकार आहे. राज्य सरकारची उडी किती लांब जाते ते पाहूया. देशाचा अमृत महोत्सव माहिती नाही हा देशाचा अपमान आहे. हा देशद्रोह आहे. तसेच मी माध्यमांशी बोलायला बांधील नाही. नोटीस आणि पत्रात यात फरक आहे. ते राष्ट्रपती आणि पंतप्रधान आहेत का आदेश काढायला? कमिशनरांनी वक्तव्य तपासून पाहावं. मी तुमच्या सांगण्यावर विश्वास ठेवणार नाही. दोन दगड मारून गेले हा पुरुषार्थ नाही. ते जे काय करत आहेत ते करू दे. तक्रारदार सुधाकर बडगुजरला मी ओळखत नाही. “नाशिक पोलीस आयुक्त यांनी नारायण राणे यांना अटक करावी असे आदेश काढले. नारायण राणेंविरोधात कलम 500, 502, 505, 153 (अ) अंतर्गत गुन्हा दाखल करण्यात आले आहेत. नाशिक पोलिसांची टीम कोकणच्या दिशेने रवाना झाली आहे. सोमवारी राणे यांच्या पत्रकार परिषदेदरम्यान त्यांनी वादग्रस्त वक्तव्य केले होते.
