मुक्ताईनगर (प्रतिनिधी) दिल्लीत जाऊन भाजप अध्यक्ष जे. पी. नड्डा यांची भेट घेतली. माझ्यावर झालेला अन्याय त्यांना सांगितला. संरक्षण मंत्री राजनाथ सिंह यांना भेटलो. गृहमंत्री अमित शहा, पंतप्रधान नरेंद्र मोदी यांना भेटून गाऱ्हाणं मांडले. पण तुम्ही देवेंद्र यांना घेऊन या. आपण चर्चेतून मार्ग काढू असे सांगण्यात आले. हा निरोप मी देवेंद्रजींना दिला. त्यावर पुढील आठवड्यात जाऊ. पुढील महिन्यात जाऊ, असे म्हणत त्यांनी चार वर्षे घालवली, असा खळबळजनक आरोप ज्येष्ठ नेते एकनाथराव खडसे यांनी केला आहे.
आज पत्रकारांशी बोलतांना खडसे म्हणाले की, तत्कालीन मुख्यमंत्री देवेंद्र फडणवीस यांच्या मंत्रिमंडळातल्या अनेक मंत्र्यांवर आरोप झाले. मात्र केवळ मलाच राजीनामा देण्यास सांगण्यात आले. इतरांना मात्र क्लीन चीट देण्यात आल्या. इतरांना आणि मला वेगळा न्याय का?. फौजदारी गुन्हे असलेल्या, इतर पक्षांमधून आलेल्यांना पाठिशी घालण्यात आले. पण पक्षासाठी ४० वर्षे राबणाऱ्या नेत्यावर सातत्याने अन्याय करण्यात आला, अशा शब्दांत खडसेंनी फडणवीस यांच्यावर टीका केली. एवढेच नव्हे तर फडणवीस यांचे नेतृत्त्व फारच सक्षम असल्यामुळे आम्ही राज्यातील सत्ता गमावली, असा उपरोधिक टोलाही खडसेंनी लगावला.
