बीजिंग (वृत्तसंस्था) चीनविरोधात दादागिरी करण्याचा प्रयत्न करणाऱ्या विदेशी शक्तींचं डोकं ठेचू अशा शब्दांमध्ये चीनचे अध्यक्ष शी जिनपिंग यांनी अमेरिकेसह इतर चीनविरोधी देशांना अप्रत्यक्ष इशारा दिला. चीनच्या जनतेनं नवं विश्व उभं केलं आहे असं सांगत त्यांनी चीनच्या कम्युनिस्ट पार्टीच्या शताब्दी सोहळ्यात देशाला संबोधित केलं.
जगभरातील कोरोनाचा प्रादुर्भाव, हाँगकाँगमधील नवा राष्ट्रीय सुरक्षा कायदा या पार्श्वभूमीवर हा सोहळा पार पडला. अमेरिकेसह संपूर्ण जगाचे या सोहळ्याकडे लक्ष लागले होते. या खास सोहळ्यासाठी शी जिनपिंग यांनी माओ त्से तुंग यांच्यासारखी वेशभूषा केली होती. चीनला झुकवण्यासाठी, दबाब टाकण्यासाठी कोणी परदेशी शक्ती प्रयत्न करत असल्यास त्यांना चीनच्या १.४ अब्ज नागरिकांच्या पोलादी ताकदीचा सामना करावा लागेल असेही त्यांनी म्हटले. चीनने कोणत्याही देशाला धमकावले नाही, ना त्यांच्यावर दबाव टाकला आणि ना एखाद्या देशाच्या नागरिकांना अंकित केले आहे. चीन यापुढेही असे करणार नसल्याचेही जिनपिंग यांनी स्पष्ट केले.
झिंजियांगमध्ये अल्पसंख्याकांना दिली जाणारी वागणूक आणि हाँगकाँगमधली दडपशाही यामुळे चीनवर वंशभेदाचा आरोप जागतिक पातळीवर होत आहे. या पार्श्वभूमीवर जिनपिंग यांनी सांगितलं की, कुठल्याही विदेशी शक्तींच्या दादागिरीला, दबावाला बळी पडणार नाही वा कुणाच्या ताटाखालचं मांजर होणार नाही आणि तसा कोणी प्रयत्न केलाच तर त्यांची डोकी १.४ अब्ज चिनी जनता ठेचेल असा इशारा त्यांनी दिला आहे. तब्बल ७० हजारांच्या संख्येनं उपस्थित असलेल्या चिनी नागरिकांनी जिनपिंग यांच्या या वक्तव्याचं प्रचंड टाळ्यांच्या गजरात स्वागत केलं.
तैवानचा प्रश्न समूळ सोडवणं आणि त्या प्रदेशाचं चीनमध्ये संपूर्ण एकात्मिकरण करणं ही हे आपल्या पक्षापुढे कधीही विचलित न होणारं ऐतिहासिक कार्य असल्याचं जिनपिंग म्हणाले. लोकशाही असलेलं तैवान आपलाच सार्वभौम भूभाग असल्याचा चीनचा दावा असून ते सिद्ध करण्यासाठी चीननं या बेटानजीक लढाऊ विमानं व बाँबर विमानंही धाडली होती. शी जिनपिंग यांचं भाषण हा जगातल्या प्रमुख देशांना या संदर्भात दिलेला इशारा असल्याचं मानण्यात येत आहे.