मुंबई (वृत्तसंस्था) जागोजागी वाहतूक पोलिसांनी ओव्हर स्पीडिंग, रेडलाइट जंपिंग आणि स्टॉप लाईनच्या पुढे गाडी थांबवणे यासारख्या वाहतुकीच्या नियमांच्या उल्लंघनावर लक्ष ठेवण्यासाठी कॅमेरे बसवले आहेत. या कॅमेऱ्यांमुळे वाहतूक नियम मोडणाऱ्या लोकांची नंबरप्लेट ऑटोमॅटिक वाचून चलन तयार होते. परंतु नंबरप्लेटवर चिखल उडाल्यास वाहनाचा नंबर स्पष्ट दिसत नाही, त्यामुळे चलन चुकीचे कापले जातात. जर चुकीचे चलन कापले गेले असेल, तर खालील पद्धतीने ते रद्द केले जाऊ शकते.
ओव्हर स्पीडिंग म्हणजेच मर्यादेपेक्षा जास्त वेगाने गाडी चालवणं, लाल सिग्नलला न थांबणं, तसंच सिग्नलला योग्य रेषेच्या पुढे थांबणं हे ट्रॅफिकच्या नियमांचं उल्लंघन आहे. असं उल्लंघन कोणत्या वाहनांकडून केलं जातंय यावर लक्ष ठेवण्यासाठी अनेक शहरांत आता कॅमेरे बसवण्यात आले आहेत. त्यामुळे नियमभंग करणाऱ्या संबंधित वाहनांच्या नंबरप्लेट्स कॅमेऱ्यांद्वारे आपोआपच वाचल्या जातात आणि त्या वाहनांच्या मालकांच्या नावे दंडाचं चलन जारी केलं जातं. अनेकदा असं होतं की, वाहनांच्या नंबरप्लेट्सवर चिखल उडालेला असतो किंवा नंबर चित्रविचित्र पद्धतीने लिहिलेला असतो. त्यामुळे कॅमेऱ्याद्वारे नंबरप्लेटचं रीडिंग योग्य प्रकारे होत नाही. साहजिकच दंडाचं चलन चुकीच्या नंबरवर फाडलं जातं.
ट्रॅफिक पोलिसांच्या हेल्पलाइन नंबरवर कॉल करू शकता
चूक नसतानाही तुमच्या नावावर चलन फाडलं गेलं असेल, तर तुम्ही ट्रॅफिक पोलिसांच्या हेल्पलाइन नंबरवर कॉल करू शकता. तसंच, जवळच्या ट्रॅफिक पोलीस स्टेशनमध्ये याची माहिती देऊ शकता. या दोन्ही ठिकाणी तुमची तक्रार ऐकली गेली नाही, तर तुम्ही न्यायालयात दाद मागू शकता. संबंधित चलन फाडण्यात ट्रॅफिक पोलीस यंत्रणेची चूक झाली आहे हे सिद्ध करता आलं, तर दंड भरावा लागत नाही.
ट्रॅफिक पोलिस स्टेशनमध्ये जाऊन तक्रार करायला हवी
स्कूटर, मोटरसायकल, कार, ट्रक अशा कोणत्याही प्रकारचं वाहन चालवत असताना कधी ना कधी चलन फाडलं जाऊ शकतं. चूक घडली असेल तर चलनावर आकारण्यात आलेला दंड भरण्याला काही पर्याय नाही. कारण वाहतूक योग्य प्रकारे चालावी यासाठी नियम केलेले असतात आणि नियमभंग केला तर दंड भरावा लागतोच; मात्र काहीही चूक नसताना चलन फाडलं गेलं तर सर्वांत आधी जवळच्या ट्रॅफिक पोलिस स्टेशनमध्ये जाऊन त्याची तक्रार करायला हवी. तिथे जाऊन चलनाची तारीख आणि वेळ नेमकेपणाने सांगून, आपली काही चूक नसल्याचं संबंधित अधिकाऱ्यांना सांगावं. त्यांनी ते मान्य केलं, तर तिथूनच तुमचं चलन रद्द होऊ शकतं.
चलन फाडलं गेलं ही बाब कोर्टात सिद्ध करणं गरजेचं
संबंधित व्यक्तीला याविरुद्ध कोर्टातही दाद मागता येते. आपण चलनाला आव्हान का दिलं आहे, आपली कोणतीही चूक नसून, गैरसमजामुळे ट्रॅफिक पोलिसांकडून चलन फाडलं गेलं आहे ही बाब कोर्टात सिद्ध करणं गरजेचं आहे. संबंधित व्यक्ती ते कोर्टात सिद्ध करू शकली, तर त्या चलनाची दंडाची रक्कम भरावी लागत नाही. ई-मेलद्वारेही याबद्दलची तक्रार ट्रॅफिक पोलिसांकडे करता येते. ट्रॅफिक पोलिसांकडून व्हेरिफिकेशन झाल्यानंतर चुकीचं चलन रद्द करता येतं. तसंच, अशा स्थितीत तक्रार कशी दाखल करायची, याबद्दल ट्रॅफिक पोलिसांकडून एक फॉरमॅटही सोशल मीडियावर शेअर केला जातो.
