नवी दिल्ली (वृत्तसंस्था) देशात कोरोनाची दुसरी लाट अद्याप पूर्णपणे ओसरलेली नाही. देशात आता दरदिवशी जवळपास ४० हजार नव्या कोरोनाबाधितांची नोंद करण्यात येत आहे. गेल्या २४ तासांत ३९ हजार ०७० नव्या कोरोनाबाधितांची नोंद करण्यात आली आहे. तर ४९१ रुग्णांचा मृत्यू झाला आहे.
आरोग्य मंत्रालयाच्या हवाल्याने देण्यात आलेल्या माहितीनुसार, देशभरात मागील २४ तासात ४३ हजार ९१० रूग्ण कोरोनातून बरे झाले असून, ३९ हजार ०७० नवीन कोरोनाबाधित आढळले आहेत. याशिवाय, ४९१ कोरोनाबाधित रूग्णांचा मृत्यू झाल्याची देखील नोंद झाली आहे. देशातील एकूण कोरोनाबाधितांची संख्या ही ३,१९,३४,४५५ झाली आहे. देशात ४,०६,८२२ अॅक्टिव्ह रूग्ण असून, एकूण ४,०६,८२२ जण कोरोनातून बरे झाले आहेत. तर, आजपर्यंत देशात ४,२७,८६२ कोरोनाबाधित रूग्णांचा मृत्यू झाल्याची नोंद झाली आहे. याचबरोबर देशात आजपर्यंत ५०,६८,१०,४९२ जणांचे लसीकरण झाले असून, यापैकी ५५,९१,६५७ जणांचे मागील २४ तासात लसीकरण झाले आहे.
जॉनसन अँड जॉनसनच्या सिंगल डोस लसीला भारतात मंजूरी
जॉनसन अँड जॉनसनच्या सिंगल डोसच्या लसीला भारतात मंजूरी मिळाली आहे. केंद्रीय आरोग्यमंत्री मनसुख मांडवीय यांनी ही माहिती ट्वीट करुन दिली आहे. मांडवीय यांनी ट्वीट करत म्हटलं आहे की, भारताने आपली लस बास्केट वाढवली आहे. जॉन्सन अँड जॉन्सनच्या सिंगल-डोस कोविड -१९ लसीला भारतात आणीबाणीच्या वापरासाठी मंजुरी देण्यात आली आहे. आता भारताकडे ५ EUA लस उपलब्ध आहे. यामुळे आपल्या देशात कोविडविरुद्धच्या लढाईला आणखी बळ मिळेल, असं आरोग्यमंत्र्यांनी म्हटलं आहे.
