जळगाव (प्रतिनिधी) रस्ता ओलांडणाऱ्या वृद्धाला वाचविण्याच्या प्रयत्न दुचाकी घसरुन दुभाजकावर आदळल्याने दुचाकीस्वार चंदू रामलाल उघडे (वय ४०, रा. कुसुंबा ) यांचा मृत्यू झाल्याची घटना जळगाव तोलकाट्याजवळ घडली होती. या प्रकरणी एमआयडीसी पोलिस ठाण्यात स्वतः मृत्यूस कारणीभूत असल्याने त्यांच्याविरुद्ध गुन्हा दाखल करण्यात आला.
मूळचे पाचोरा तालुक्यातील कासमपुरा येथील रहिवासी असलेले चंदू रामलाल उघडे हे (ह. मु. कुसुंबा) येथे आपल्या कुटुंबियांसह वास्तव्यास आहे. दि. २७ जून रोजी रात्री ते (एमएच १९, एसी ९६४१) क्रमांकाच्या दुचाकीने घरी जाण्यासाठी निघाले. यावेळी जळगाव तोलकाट्याजवळ एक वृद्ध रस्ता ओलांडत होते. त्यांना वाचविण्यासाठी दुचाकीस्वाराने अचानक ब्रेक दाबला. त्यावेळी नेमका पाऊस पडत असल्यामुळे दुचाकी घसरली व ती रस्त्याच्या मधोमध असलेल्या सिमेंटच्या दुभाजकावर धडकली. या अपघातात चंदू उघडे यांच्या डोक्याला दुखापत झाल्याने त्यांचा मृत्यू झाला होता. या प्रकरणी एमआयडीसी पोलिस ठाण्यात स्वतःच्या मृत्यूस कारणीभूत ठरल्याने मयताविरुद्ध गुन्हा दाखल करण्यात आला.