गडचिरोली (वृत्तसंस्था) दुचाकीस्वाराला वाचविण्याच्या लोहखनिजाची वाहतूक करणाऱ्या ट्रक चालकांचे नियंत्रण सुटल्याने ट्रक रस्त्याच्या बाजूला असलेल्या शहीद स्मारकाला धडकले. यात दोघे जागीच ठार झाल्याची घटना गडचिरोली शहरापासून दोन किमी अंतरावरील मुरखळा (नवेगाव) येथे रविवारी सकाळी ११ वाजेच्या सुमारास घडली.
मुकरू गोमसकार (५५), रा. मुरखळा व मधुकर चव्हाण, रा. पुसद जिल्हा यवतमाळ, असे मृतकाचे नाव आहे. ट्रक चालक पिंटू मजोके (रा. किसाननगर, ता. सावली) हा जखमी आहे. मधुकर चव्हाण हासुद्धा दुसऱ्या ट्रकचा चालक आहे. मधुकर चव्हाण याला गावाकडे जायचे होते. त्यामुळे तो पिंटू मजोकेच्या ट्रकमध्ये बसून किसाननगरपर्यंत जाणार होता. तेथून तो दुसऱ्या ट्रकने जाणार होता. भरधाव वेगात असलेल्या ट्रकसमोर अचानक दुचाकीस्वार आला. त्याला वाचविण्याच्या प्रयत्नात ट्रक चालकाचे नियंत्रण सुटले व ट्रक रस्त्याच्या बाजूला ग्रामपंचायत कार्यालयाजवळ असलेल्या शहीद स्मारकाला धडकला. यात एकाचा मृत्यू झाला. याचसोबत रस्त्याच्या बाजूला बसची प्रतीक्षा करीत असलेल्या व्यक्तीच्या अंगावरून ट्रक गेल्याने त्याचाही जागीच मृत्यू झाला. घटनेची माहिती मिळताच गडचिरोली पोलिस घटनास्थळी दाखल झाले. अपघात गावातच घडल्याने अपघातस्थळी मोठी गर्दी जमली होती.
