बोदवड (प्रतिनिधी) तालुक्यातील येवती येथे विद्यार्थिनींचा पाठलाग करणाऱ्या रोड रोमिओला विद्यार्थिनींनी चांगलीच अद्दल घडवली आहे. पीडित विद्यार्थिनींनी आरोपीला भर रस्त्यात चपलांनी चांगलेच चोपले आहे. या घटनेचा व्हिडीओ समोर आला असून सोशल मीडियात वेगानं व्हायरल (Viral video) होतं आहे. या व्हिडीओत काही विद्यार्थिंनी आरोपी तरुणाला भररस्त्यात चप्पलेनं मारहाण करताना दिसत आहे.
मिळालेल्या माहितीनुसार, संबंधित घटना जळगाव जिल्ह्याच्या बोदवड तालुक्यातील येवती येथील आहे. रोड रोमिओच्या रोजच्या त्रासाला कंटाळून येथील काही विद्यार्थिनी रणरागिनी बनल्या आहेत. त्यांनी भररस्त्यात आरोपीला बेदम चोप दिला आहे. यावेळी आरोपी हात जोडून तरुणींची माफी मागताना दिसत आहे. यावेळी परिसरातील अनेक नागरिकांनी घटनास्थळी गर्दी केल्याचं देखील दिसत आहे. यावेळी गर्दीतील काही लोकांनी देखील आरोपीला मारहाण केली आहे.
खरंतर, मागील काही दिवसांपासून राज्यात एसटी बसेस बंद आहेत. अशात कोरोना प्रादुर्भाव कमी झाल्याने शाळा आणि महाविद्यालये पुन्हा सुरू करण्यात आले आहे. पण एसटी बंद असल्याने ग्रामीण भागातील विद्यार्थ्यांना पायपीट करत शाळा-महाविद्यालयात जावं लागत आहे. येवती येथील काही विद्यार्थिनी देखील पायपीट करत शाळा महाविद्यालयात जावं लागत आहे. त्यांना जवळपास दोन किलोमीटर पायपीट करावी लागते.
दरम्यान, एक तरुण मागील काही दिवसांपासून या विद्यार्थिनींचा पाठलाग करत होता. समज देऊनही आरोपी त्यांचा पाठलाग करायचं थांबवत नव्हता. अखेर संबंधित मुलींनीच आरोपीला धडा शिकवण्याचा निर्णय घेतला. त्यांनी संबंधित रोड रोमिओला चांगलाच चोप दिला आहे. यावेळी घटनास्थळी जमलेल्या काही नागरिकांनी देखील आपला हात रिकामा करून घेतला आहे. या घटनेचा व्हिडीओ सध्या सोशल मीडियात वेगानं व्हायरल होत आहे.
