बोदवड (प्रतिनिधी) – तालुक्यातील मुक्तळ येथे शेतजमिनीच्या मोजणीवरून सुरू असलेल्या वादातून एका शेतकऱ्यांवर त्यांच्या नातेवाईकांनी मारहाण केल्याची घटना घडली याप्रकरणी जखमी शेतकरी दिनेश देवराम साबळे (वय ३५) यांनी बोदवड पोलिस स्टेशनमध्ये तक्रार दाखल केली आहे.
दरम्यान दिनेश साबळे यांनी त्यांच्या वडिलांच्या नावावरील गट क्रमांक ५२/२ या शेतजमिनीची मोजणी करण्यासाठी जानेवारी २०२६ मध्ये भूमीअभिलेख कार्यालय, बोदवड येथे अर्ज केला होता. दि. २२ एप्रिल २०२६ रोजी भूमीअभिलेख विभागाकडून शेतजमिनीची मोजणी करण्यात आली. त्यावेळी शेजारील गट क्रमांक ५२/१ मधील काही क्षेत्र त्यांच्या शेतजमिनीत असल्याचे निष्पन्न झाल्याचे तक्रारीत नमूद करण्यात आले आहे. याच कारणावरून दि. २८ मे रोजी सकाळी साडेसात वाजेच्या सुमारास दिनेश साबळे हे शेतात गेले असता संबंधित क्षेत्रात ट्रॅक्टरने नांगरटी सुरू असल्याचे दिसून आले. याबाबत जाब विचारल्यावर देविदास आसाराम धनगर, सकुबाई देविदास धनगर, धीरज देविदास धनगर व अक्षय रविंद्र साबळे यांनी शिवीगाळ करत लाथाबुक्क्यांनी व काठ्यांनी मारहाण केल्याचा आरोप करण्यात आला आहे. तसेच देविदास धनगर यांनी हातातील विळ्याने डोक्यावर वार करून जखमी केले व जीवे मारण्याची धमकी दिल्याचे फिर्यादीत म्हटले आहे. घटनेवेळी परिसरातील विनोद सुकदेव उबाळे, शब्बीर हुसेन बागवान, रतन संतोष साबळे व पंकज नारायण साबळे यांनी मध्यस्थी करून भांडण सोडविल्याचे सांगण्यात आले.
जखमी दिनेश साबळे यांन प्रथम ग्रामीण रुग्णालय, बोदवड येथे उपचारासाठी नेण्यात आले त्यानंतर पुढील उपचारासाठी त्यांना जळगाव जिल्हा शासकीय रुग्णालयात पाठविण्यात आले आहे . उपचारानंतर त्यांनी बोदवड पोलिस ठाण्यात तक्रार दाखल केली असून पुढील तपास सुरू आहे.
