जळगाव (प्रतिनिधी) शहरातील खाजगी रुग्णालयात दाखल पतीला जेवणाचा डबा घेऊन जाण्यासाठी घरून निघालेल्या पत्नीला गावातच काही अंतरावरच रुग्णवाहिकेने धडक दिली. या अपघातात तिचा जागीच मृत्यू झाल्याची घटना शुक्रवारी सकाळी साडेआठ वाजेच्या सुमारास जळगाव तालुक्यातील कुसुंबा गावात घडली. संगीता कैलास पाटील (वय-48) रा. कुसुंबा ता. जि. जळगाव असे मृत महिलेचे नाव आहे. एकीकडे पतीवर उपचार सुरू तर दुसरीकडे पत्नीचा मृत्यू झाल्याने हळहळ व्यक्त केली जात आहे.
जळगाव तालुक्यातील कुसुंबा येथे संगीता कैलास पाटील या आपल्या पती कैलास लक्ष्मण पाटील, सासू इंदुबाई आणि मुलगा शुभम यांच्यासह वास्तव्याला होत्या. गेल्या 8 दिवसांपासून कैलास पाटील हे आजारी असल्यामुळे त्यांना जळगाव येथील चिन्मय हॉस्पिटल या खाजगी रुग्णालयात दाखल करण्यात आले आहे. संगीताबाई पाटील ह्या आज शुक्रवार सकाळी 8.30 वाजता सासू इंदुबाई यांच्यासोबत पतीसाठी जेवणाचा डबा घेवून निघाल्या जळगाव येथे जाण्यासाठी घरून निघाल्या. कुसुंबा गावातून येत असताना भरधा वेगाने येणाऱ्या रुग्णवाहिका क्रमांक (एमएच 19 सीवाय 7091) ने जोरदार धडक दिली.
या धडकेत संगीताबाई यांच्या डोक्याला गंभीर दुखापत झाल्याने त्या जागीच ठार झाल्या. ज्या रुग्ण वाहिकेने धडक दिली, त्याच रुग्ण वाहीकेतून संगीताबाई पाटील यांचा मृतदेह शासकीय वैद्यकीय महाविद्यालयात दाखल करण्यात आला. याठिकाणी तपासणीअंती वैद्यकीय अधिकारी यांनी संगीताबाई यांना मयत घोषित केले. याप्रकरणी एमआयडीसी पोलिसात गुन्हा दाखल करण्यात आला आहे.
डोळ्यादेखत सुनेच्या मृत्यूने सासूला बसला मोठा धक्का
संगीताबाई यांच्यासोबत त्यांच्या सासूबाई इंदुबाई होत्या. डोळा देखत सुनेचा अपघातात मृत्यू झाल्याने सासू इंदुबाई यांनी मन हेलावणारा आक्रोश केला. एकीकडे मुलगा रुग्णालयात दाखल तर दुसरीकडे सुनबाईचा मृत्यू यामुळे इंदुबाई यांना मोठा धक्का बसला. मयत संगिताबाई यांच्या पश्चात पती, एक मुलगा शुभम, सून, सासू आणि नम्रता व तेजस्विनी अशा दोन विवाहित मुली असा परिवार आहे.
