नवी दिल्ली (वृत्तसंस्था) सध्या सोशल मीडियावर एक पोलिसांच्या अरेरावीचा व्हिडीओ प्रचंड व्हायरल होत आहे. तेलंगणामधील एका व्हिडीओत तरूणामध्ये आणि पोलीस अधिकाऱ्यामध्ये चांगलीच बाचाबाची होत असल्याचं लक्षात येतं. व्हिडीओमध्ये व्यक्तीनं आरोप केला आहे की त्याला महेबूबनगरमधील एका पोलीस अधिकाऱ्यानं मारहाण केली. पोलीस अधिकाऱ्यानं त्या व्यक्तीला आठ वर्षाच्या मुलीसमोर कानशिलात लागवली आहे.
सोशल मीडियावर व्हायरल झालेल्या या व्हिडीओमध्ये आपण पाहू शकतो की, उपनिरीक्षक पदावरील वरिष्ठ पोलीस अधिकारी आणि एका तरूणामध्ये कसला तरी वाद सुरू असल्याचं दिसून येतंय. एका आठ वर्षाच्या मुलीला सोबत घेऊन आलेल्या या व्यक्तीचं नाव श्रीनिवास असं असल्याचं कळतंय. श्रीनिवास आपल्या आठ वर्षांच्या मुलीसह भाजी खरेदी करण्यासाठी जात असल्याची माहिती आहे. त्यावेळी हेल्मेट न घातल्यामुळे या पोलीसाने त्याला थांबवलं आणि त्याच्या आठ वर्षाच्या मुलीसमोरच त्याला कानशिलात मारली असल्याचा दावा या व्यक्तीने केलाय.
आपल्या आठ वर्षाच्या मुलीला हाताशी धरून हा व्यक्ती पोलीसाला याबाबत वारंवार जाब विचारताना दिसून येतोय. “पोलिसांना मारण्याचा अधिकार कोणी दिला?” असा जाब विचारत यावर श्रीनिवास पोलिसांशी वाद घालताना दिसून येत आहेत. या व्हिडीओमध्ये श्रीनिवास तेलुगु भाषेत बोलत असल्याने आपल्याला भाषा समजणार नाही, पण त्याच्या आणि आठ वर्षाच्या मुलीच्या चेहऱ्यावरील हावभाव पाहिल्यानंतर कोणत्याही भाषेची किंवा शब्दाची गरज पडत नाही. “पोलीस थांबवू शकतात, दंड सुद्धा आकारू शकतात, पण मारू शकत नाहीत. मला का मारलं?” असं श्रीनिवास वारंवार या व्हिडीओमध्ये तेलुगु भाषेत बोलताना दिसून येत आहे. पण, पोलिसाने त्याला कानशिलात मारल्याचा अद्याप कोणताही व्हिडीओ मात्र समोर आलेला नाही.
श्रीनिवासचं हे म्हणणं ऐकून ये-जा करणारे लोक तिथे जमतात आणि त्याला साथ देतात. काही लोक पोलिसांशी झालेल्या वादाचे व्हिडीओ बनवू लागतात. त्यानंतर पोलीस इथल्या जमावाला हटवताना दिसून येत आहेत. हे पाहून श्रीनिवासची मुलगी घाबरते आणि रडू लागते. हा व्हिडीओ सोशल मीडियावर व्हायरल होत आहे. जिल्हा पोलिस प्रभारी कोटी रेड्डी यांनी सांगितले की, त्या व्यक्तीने मुनिरुल्लाला शिवीगाळ केली. मुलीचा जबाब दुसर्‍या व्हिडीओमध्ये आहे. यामध्ये ती म्हणते की तिच्या वडिलांना थांबवलं गेलं आणि हेल्मेट न घातल्याबद्दल तिच्या वडिलांना फटकारलं. तसंच त्याच्या दुचाकीच्या चाव्या हिसकावून घेतल्याचं देखील सांगितलं. तिच्या वडिलांनी विरोध केल्यावर उपनिरीक्षकाने त्याला कानशिलात मारली, असं देखील मुलीच्या जबाबात म्हटलंय.
