नवी दिल्ली (वृत्तसंस्था) देशातील कोरोना संकट अद्याप टळलेलं नाही. दरदिवशी जवळपास ५० हजार नव्या कोरोनाबाधितांची नोंद होत आहे. गेल्या २४ तासांत ४४ हजार १११ नव्या कोरोनाबाधितांची नोंद करण्यात आली आहे. तर ७३८ कोरोनाबाधितांचा मृत्यू झाला आहे.
आरोग्य मंत्रालयाने दिलेल्या माहितीनुसार, देशात गेल्या २४ तासात ४४ हजार १११ नव्या बाधित रुग्णांची नोंद करण्यात आली आहे. काल हाच आकडा ४६ हजारांहून अधिक होता. आज बाधितांच्या संख्येत २ हजारांहून अधिक घट झाली आहे. देशात आतापर्यंत नोंद करण्यात आलेल्या बाधितांची संख्या ३ कोटी ५ लाख २ हजार ३६२ इतकी आहे. २ जुलैपर्यंत देशभरात ३४ कोटी ५० लाख कोरोना लसींचे डोस देण्यात आले आहेत. काल दिवसभरात ५० लाख लसींचे डोस देण्यात आले आहेत. तसेच आतापर्यंत ४१.६४ कोटी कोरोना चाचण्या करण्यात आल्या आहेत. काल दिवसभरात जवळपास १९ लाख कोरोना सॅम्पल्स तपासण्यात आले आहेत. ज्यांचा पॉझिटिव्हिटी रेट ३ टक्क्यांहून अधिक आहे.
राज्यातील स्थिती
राज्यात दैनंदिन कोरोना बाधित रुग्णांची संख्या काही दिवसांपासून दहा हजारांच्या आत येऊ लागली आहे. राज्यात काल (शुक्रवारी) ८,३८५ रुग्णांना डिस्चार्ज मिळाला तर ८,७५३ नवीन रुग्णांची नोंद करण्यात आली आहे. तर राज्यातील अॅक्टिव्ह केसेस एक लाख १६ हजारांच्या जवळ आल्या आहेत. विशेष म्हणजे काल मालेगाव आणि नंदुरबारमध्ये एकही कोरोना रुग्णांची नोंद सरकारी आकडेवारीनुसार झालेली नाही. तर आज राज्यातील ३४ शहरं आणि जिल्ह्यांमध्ये एकाही मृत्यूची नोंद झालेली नाही. राज्यात गुरुवारी ९,१९५ नवीन कोरोनाबाधित रुग्णांची नोंद झाली होती तर ८,६३४ कोरोनाबाधित रुग्णांना डिस्चार्ज देण्यात आला होता. आजपर्यंत ५८,३६,९२० रुग्णांनी कोरोनावर मात केली आहे.
