जळगाव (प्रतिनिधी) शहरातील सार्वजनिक बांधकाम विभागात आज दुपारी जोरदार राडा झाल्याची चर्चा दिवसभर सुरु होती. त्याच पार्श्वभूमीवर आज माहिती अधिकार कार्यकर्ते दीपककुमार गुप्ता यांनी थेट मुख्यमंत्र्यांकडे जळगाव बांधकाम विभागात सीसीटीव्ही कॅमेरे बसविण्याची मागणी केली आहे.
दीपककुमार गुप्ता यांनी आज मुख्यमंत्री, गृहमंत्री, पोलीस महासंचालक, विशेष पोलीस महानिरीक्षक, मुख्य अभियंता महोदय, सार्वजनिक बांधकाम विभाग, नाशिक, जळगाव जिल्हाधिकारी आणि जळगाव पोलीस अधीक्षक यांच्याकडे पाठवलेल्या तक्रारी अर्जात म्हटले आहे की, आज दि.12 डिसेंबर रोजी वेळ भरदिवसा 12.30 सुमारास जिल्हाधिकारी कार्यालय समोरील जळगाव सार्वजनिक बांधकाम विभागाच्या कार्यालयमध्ये दोन गटात बाचाबाची झाली व त्या दोघी गटाने एकमेकावर तलवारी काढल्या.
यापूर्वी पण अशी घटना दोन वेळा झालेली आहे. त्यावेळी एकमेकांवर पिस्तूल काढले गेले होते.
आजची घटनेचे अनेक लोक साक्षीदार आहेत. परंतु ते घाबरलेले असून कोणीही तक्रार देणेसाठी पुढे येत नाही व तिथे सीसीटीव्ही कॅमेरे नसल्यामुळे ही घटना कुठेही नोंद झालेली नाही. परंतु हे कायदा व सुव्यवस्थाचे दृष्टीने अत्यंत घातक व चुकीचे आहे. याप्रकाराला आळा बसण्यासाठी तिथे त्वरित सीसीटीव्ही कॅमेरे पूर्ण कार्यालयमध्ये लावण्यात यावे व आज घडलेल्या घटनेची सखोल चौकशी करून जे कोणी दोषी असेल त्याच्यावर कारवाई करण्यात यावे, असेही म्हटले आहे.