बंगळुरु (वृत्तसंस्था) डेटिंग अॅपवरून ओळख (Friendship on dating app) झालेल्या नर्सवर चार जणांनी सामूहिक बलात्कार केल्याची धक्कादायक घटना उघडकीस आली आहे. या प्रकरणी बंगळुरू पोलिसांनी चारही आरोपींना अटक केली असून न्यायालयीन कोठडीत त्यांची रवानगी करण्यात आली आहे. चौघंही आरोपी दिल्लीतील व्यावसायिक जलतरणपटू अर्थात स्विमर्स असल्याची माहिती आहे. ट्रेनिंगसाठी ते बंगळुरुला आले होते.
पीडितेने पोलिसात तक्रार दाखल केल्यानंतर गेल्या आठवड्यात पोलिसांनी गुन्हा दाखल केला. रजतने आपल्याला न्यू बेल रोडवरील एका हॉटेलच्या रुममध्ये भेटायला बोलावलं होतं, असा दावा पीडितेने तक्रारीत केला आहे. डिनरनंतर मी रजतसोबत त्याच्या रुमवर गेले. त्यावेळी तिथे त्याचे आणखी तीन मित्र आधीपासूनच बसले होते. त्यानंतर चौघांनी माझ्यावर आळीपाळीने बलात्कार केला, असा आरोपी पीडित नर्सने केला आहे.
चौघंही व्यावसायिक जलतरणपटू
संजयनगर पोलिसांच्या सूत्रांनी दिलेल्या माहितीनुसार पीडितेच्या वैद्यकीय अहवालात बलात्काराच्या आरोपांना पुष्टी मिळाली आहे. रजत, शिव राणा, योगेश कुमार आणि देव सरोही अशी आरोपींची नावं आहेत. चौघंही विशीच्या आसपासचे आहेत. रजत आणि शिव राणा तीन महिन्यांपूर्वीच बंगळुरुला आले होते. ते एका भाड्याच्या घरात राहतात. तर देव आणि योगेश गेल्याच आठवड्यात तिथे पोहोचले. स्विमिंगच्या ट्रेनिंगसाठी सगळे जण बंगळुरुला गेले होते. चौघा आरोपींची रवानगी न्यायालयीन कोठडीत करण्यात आली आहे.
