जळगाव (प्रतिनिधी) शहरातील काशीनाथ लॉजजवळून रिक्षातून प्रवास करत असतांना चोरट्यांनी प्रवाश्याच्या खिश्यातून १५ हजारांची रोकड चोरून नेल्याची घटना मंगळवारी १० सप्टेंबर रोजी सायंकाळी ७.१५ वाजेच्या सुमारास घडली आहे. याप्रकरणी बुधवारी ११ सप्टेंबर रोजी सायंकाळी ७ वाजता एमआयडीसी पोलीस ठाण्यात गुन्हा दाखल करण्यात आला आहे.
शहरातील शनिपेठ परिसरातील चंदनवाडी भागात राजेंद्र रामचंद्र पाटील (वय-५८) हे वास्तव्यास असून ते खासगी नोकरी करतात. मंगळवारी १० सप्टेंबर रोजी सायंकाळी सव्वासात वाजेच्या सुमारास ते कस्तुल हॉटेल ते काशिनाथ लॉज दरम्यान, रिक्षातून प्रवास करीत होते. यावेळी रिक्षाता बसलेल्या संशयित अफजल बेग अन्वर बेग (वय २८, रा. गेंदालाल मिल) या चोरट्याने त्यांच्या खिशातून १५ हजारांची रोकड लांबवल्याचे समोर आले. याप्रकरणी प्रवाशी राजेंद्र पाटील यांनी बुधवारी ११ सप्टेंबर रोजी सायंकाळी ७ वाजता एमआयडीसी पोलिसात धाव घेत तक्रार दिली. त्यानुसार चोरट्याविरुद्ध गुन्हा दाखल करण्यात आला असून संशयित अफजल बेग अन्वर बेग याला अटक करण्यात आली आहे. पुढील तपास पोलीस नाईक हेमंत जाधव हे करीत आहे.
