जळगाव (प्रतिनिधी) पाचोऱ्याकडून जळगावकडे जाणा-या भरधाव कारने दुचाकीला धडक देऊन झालेल्या अपघातात दुचाकीस्वार शेतकरी ठार झाल्याची घटना मंगळवारी दुपारी रामदेववाडी गावाच्या काही अंतरावर घडली. याप्रकरणी पोलिसात अकस्मात मृत्यूची नोंद करण्यात आलीय. रमेश मदन राठोड (४५, रा. रामदेववाडी) असे मृत दुचाकीस्वार शेतक-याचे नाव आहे.
या संदर्भात अधिक असे की, रामदेववाडी येथील रहिवासी रमेश राठोड हे मंगळवारी दुपारी ४.३० वाजेच्या सुमारास दुचाकीने जळगाव शहराच्या दिशेने निघाले होते. गावाच्या काही अंतरावर असलेल्या टेकड्यांजवळील रस्त्यावरून जात असताना त्यांच्या दुचाकीला पाचो-याकडून जळगावकडे जाणा-या भरधाव कार क्र. (एमएच.१९.डी.व्ही.७५१३) ने ओव्हरटेकच्या नादात धडक दिली. या अपघातात राठोड यांना गंभीर दुखापत होवून ते बेशुध्द झाले.
काही मिनिटात घटनास्थळी ग्रामस्थांसह म्हसावद आउटपोस्टचे पोलिस कर्मचारी प्रदीप पाटील व स्वप्निल पाटील यांनी घटनास्थळी येवून राठोड यांना वाहनातून जिल्हा रूग्णालयात हलविले. मात्र, रस्त्यातच राठोड यांचा मृत्यू झाला. दरम्यान, पोलिसांनी अपघातग्रस्त दोन्ही वाहने ताब्यात घेतले असून एमआयडीसी पोलिसात अकस्मात मृत्यूची नोंद करण्यात आली आहे.
