जळगाव (प्रतिनिधी) वारकरी शेकडो किलोमीटर पायी चालत जात विठ्ठलाचं दर्शन घेतात. पण माझा विठ्ठल मला घरी येऊन दर्शन देईल, याचा मी स्वप्नात देखील विचार केला नव्हता. पण हे खरंय की, भर धगधगत्या उन्हात माझ्या विठ्ठलाने घरी येऊन मला दर्शन दिलंय. शब्दात व्यक्त करू शकत नाही, एवढं माझं मन दाटून आलंय. माझ्या परिवाराने दिवाळी आधीच दिवाळी साजरी केली हो !, असं सांगत राष्ट्रवादीचे प्रदेश प्रवक्ते योगेश देसले यांना भावना अनावर झाल्या होत्या. राष्ट्रवादीचे अध्यक्ष खा. शरद पवार यांच्या कौटुंबिक भेटीनंतर ते ‘द क्लिअर न्यूज’ सोबत बोलत होते.
राष्ट्रवादीचे प्रदेश प्रवक्ते योगेश देसले यांनी आपल्या फेसबुक पोस्टच्या माध्यमातूनही आपल्या भावनांना वाट मोकळी करून दिली. त्यात त्यांनी म्हटले की, मुंबईत माझी साहेबांशी कामानिमित्ताने केव्हाही भेट झाली की, साहेब आपुलकीने विचारपुस करायचे. मी ही अनेकवेळा साहेबांना जळगाव दौऱ्यात घरी येण्याची विनंती करायचो. आलो की तुझ्या घरी नक्की येईल म्हणत साहेब हसत हसत मला शब्द द्यायचे. साहेब शब्द देतात म्हणजे पाळतातच. त्यानुसार साहेबांनी दिलेला शब्द खरा केला आणि माझ्या घराला पाय लावून मला भाग्यवंत केलं.
अमळनेर येथे ग्रंथालय सेलचे प्रदेशाध्यक्ष उमेश पाटील यांनी आयोजित केलेल्या राष्ट्रवादी काँग्रेसच्या ग्रंथालय सेलच्या राज्यस्तरीय अधिवेशनसाठी साहेब १६ जून ला जिल्हा दौऱ्यावर असल्याचा दौरा कार्यक्रम प्रशासनाला आला देखील होता. त्यात साहेबांच्या वेळा पाहून मलाही वाटलं आपण एकदा परत आग्रह करावा. त्यामुळे मी साहेबांना व्हाट्सएपच्या माध्यमातून दोन ओळीचा मॅसेज टाकला. थोड्याच वेळात मला साहेबांच्या ऑफिसमधून फोन आला आणि मी थोडा स्तब्ध झालो. खरं म्हणजे माझा विश्वास बसला नाही मात्र, साहेबांचे पीएस सतीश राऊत हे माझ्याशी बोलत होते. राऊत साहेब म्हणाले साहेबांनी मला आपल्याशी बोलायला सांगितलं आहे. तुम्ही साहेबांना घरी भेट देण्यासाठी विनंती केलीय का? मी म्हणालो हो..! आणि त्यांनी फोन ठेवला.
थोड्या वेळाने परत राऊत साहेबांचा फोन आला आणि मला म्हटले साहेब येणार आहेत, तुमच्याकडे. दुपारी साडेतीनची वेळ दिली आहे. तुमचा घराचा पत्ता सांगा ! सुधारित दौरा झाला की तुम्हाला पाठवतो म्हणून सांगितले. ठरल्याप्रमाणे साहेब अमळनेर येथील कार्यक्रम आटोपून भर उन्हात माझ्या निवासस्थानी दिलेल्या वेळात दाखल झाले. जिल्ह्याच्या तापमानाच्या दृष्टीने पाहिलं तर साहेबांच्या चेहऱ्यावर प्रचंड ऊर्जा होती. साहेब घरी आले. माझ्या कुटुंबियांशी दिलखुलास गप्पा केल्यात. माझे मोठे मामा कै. शांताराम पवार यांचे निधन झाल्याने माझे तिन्ही मामा माझ्याकडे आलेले होते. साहेबांनी त्यांचेही सांत्वन केले.
माझ्या आईचे वडील स्वातंत्र्य सैनिक स्व.नामदेवराव पवार हे काँग्रेसचे कट्टर पुढारी होते.आणि १९९३ साली साहेब मुख्यमंत्री असताना माझ्या आजोबांना महाराष्ट्र शासनाच्या वतीने सन्मान पत्र मिळाले होते. तेव्हा पहिल्यांदा साहेबांना मुंबईत जवळून पाहिलं होतं. त्यावेळी माझं वय अवघे १२ वर्ष होत. त्याकाळीच काय तर कधी मला स्वप्नात देखील वाटल नव्हतं की, आज माझ्या आयुष्यातील हा प्रसंग येईल आणि त्यांचा कार्यकर्ता म्हणून साहेब माझ्या घरी येतील. साहेबांनी मला दिलेला शब्द खरा केला हा माझ्यासारख्या सर्वसामान्य कार्यकर्त्याचा मी सन्मानच समजतो. भेटला विठ्ठल माझा, भेटला विठ्ठल या आशयाचा भावनिक व्हिडीओ देखील योगेश देसले यांनी सोशल मीडियात शेअर केला आहे.
दरम्यान, अमळनेर येथून दुपारी २.३० वाजता शरद पवार हे प्रदेश प्रवक्ते योगेश देसले यांच्या आहुजानगरातील निवासस्थानी आले होते. यावेळी आमदार एकनाथराव खडसे, अरुणभाई गुजराथी, जिल्हाध्यक्ष अॅड. रवींद्र पाटील यांच्यासह पदाधिकारी उपस्थित होते.
