जळगाव (प्रतिनिधी) भरधाव वेगाने जाणाऱ्या काँक्रीट मिक्सर वाहनाने दिलेल्या धडकेत दुचाकीस्वाराचा मृत्यू झाल्याची घटना जकात नाकाजवळ बुधवारी २५ सप्टेंबर रोजी दुपारी १२ वाजेच्या सुमारास घडली आहे. तर दुसरा तरूण जखमी झाला आहे. याबाबत जळगाव तालुका पोलीस ठाण्यात गुन्हा दाखल करण्याचे काम सुरू होते. कुणाल राजेंद्र महाले वय-२५, रा. नहाटा नगर, भुसावळ असे मयत झालेल्या तरुणाचे नाव आहे.
भुसावळ शहरातील नहाटा नगरात कुणाल महाले हा तरुण आई वडील आणि लहान भाऊ यांच्यासोबत वास्तव्याला होता. कुणाल हा नुकताच तीन महिन्यापूर्वीच भुसावळ शहरातील के.नारखेडे महाविद्यालयात क्लर्क म्हणून नोकरीला लागला होता. दरम्यान महाविद्यालयाच्या कामात कामकाजानिमित्त कुणाल महाले आणि त्याचे सहकारी निखिल शरद बराटे हे दोन्ही दोघेजण भुसावळवरून विद्यापीठात जाण्यासाठी जळगाव शहरातून जात होते. त्यावेळी बुधवारी २५ सप्टेंबर रोजी दुपारी १२ वाजेच्या सुमारास जळगाव शहराच्या पुढे असलेल्या जकात नाका जवळून जात असताना मागून भरधाव वेगाने येणारे काँक्रीट मिक्सरने त्यांच्या दुचाकीला कट मारला.
या अपघातात कुणाल महाले हा रोडवर पडल्याने मागून येणाऱ्या काँक्रीट मिक्सरच्या मागच्या चाकाखाली आले. त्यात कुणालाचा जागीच मृत्यू झाला तर निखिल बऱ्हाटे हा किरकोळ जखमी झाला आहे. दरम्यान ही घटना घडल्यानंतर नातेवाईक व महाविद्यालयातील सहकारी यांनी जिल्हा शासकीय वैद्यकीय महाविद्यालयात धाव घेतली. यावेळी नातेवाईकांनी एकच आक्रोश केल्याचे पाहायला मिळाले. याबाबत जळगाव तालुका पोलीस ठाण्यात गुन्हा नोंदविण्याचे काम सुरू होते.
