जळगाव (प्रतिनिधी) पाच आपत्य असतांना रेशनकार्डमध्ये फेरफार करुन दोन आपत्य दाखविले. तसेच वडीलांच्या नावाने असलेली – १ लाख ५२ हजारांची वैद्यकीय देयकांची परीपुर्ती रक्कम घेतली. तसेच अधिकार नसतांना शाळा समितीच्या बैठकीत खोटा ठराव मंजूर करुन शासनाची फसवणुक केल्याप्रकरणी शेख हरुण शेख बशीर, अ. करीम अ. मजीद सालार, डॉ. इकबाल मजीद शहा यांच्याविरुद्ध एमआयडीसी पोलिसात गुन्हा दाखल करण्यात आला आहे. याप्रकरणी फारुख शेख यांनी तक्रार दिली आहे.
शहरातील सालार नगरातील सामाजिक कार्यकर्ता फारुख शेख अब्दुल्ला यांनी पोलिसात तक्रार दिली. यामध्ये त्यांनी संशयित शेख हरुण शेख बशीर हे जळगाव तालुक्यातील बोरणार येथील इकरा हायस्कुलमध्ये मुख्याध्यापक म्हणून नोकरीस असतांना त्यांचे वडील हे सेवानिवृत्तीचे वेतन घेत होते. तसेच त्यांचे वडील हे संशयितावर अवलंबवुन नसतांना देखील संशयित शेख हरुण शेख बशीर यांनी ते अवलंबवून असल्याचे दर्शवले. त्याचप्रमाणे संशयित शेख हरुण यांना पाच आपत्य असतांना त्यांनी रेशनकार्डमध्ये फेरफार करुन दोन आपत्य असल्याचे दाखवून त्यांच्या वडीलांचे नावे असलेली १ लाख ५२ हजार रुपयांची वैद्यकीय देयकांची परीपुर्ती रक्कम घेतली. त्याचप्रमाणे संशयित अ. करीम अ. मजीद सालार व डॉ. इकबाल मजीद शहा यांनी एम. ई. पी. एस. अॅक्ट १९७७ नुसार मुख्याध्यापकाचा पगार, रजा, वैद्यकीय परीपुर्तता व इतर निर्णयाबाबतीत शाळा समितीला कोणताही ठराव पारित करण्याचा अधिकार नव्हता.
अधिकार नसतांना देखील संस्थेचे अध्यक्ष अ. करीम सालार व उपाध्यक्ष डॉ. इकबाल शहा यांनी पदाचा दुरुपयोग करुन दि. ३० मार्च २००७ रोजी शाळा समितीच्या सभेत विषय नसतांना शेख हरुण यांच्या वैद्यकीय बील परीपुर्ती बाबत बाबत खोटा ठराव मंजूर करुन शासनाची फसवणुक केली. याप्रकरणी फारुख शेख यांनी दिलेल्या तक्रारीवरुन इकरा हायस्कुलचे मुख्याध्यापक शेख हरुण शेख बशीर (वय ५७, रा. शाहूनगर) यांच्यासह संस्था अध्यक्ष अ. करीम अ. मजीद सालार (वय ७५, रा. बळीराम पेठ), उपाध्यक्ष डॉ. इकबाल मजीद शहा (वय ७३, रा. सालार नगर) यांच्याविरुद्ध फसवणुकीचा गुन्हा दाखल करण्यात आला आहे. तपास पोहेकों प्रदीप पाटील हे करीत आहे
