जळगाव (प्रतिनिधी) एका खासगी बँकेच्या क्रेडीट कार्डवर ऑफर असल्याचे आमिष दाखवत एका सेवानिवृत्त कर्मचाऱ्याच्या बँक खात्यातून परस्पर २ लाख ७८ हजार रुपये परस्पर काढून फसवणूक केल्याचा प्रकार १५ ऑगस्ट रोजी घडला आहे. चौकशी अंती अखेर मंगळवारी ३ सप्टेंबर रोजी जिल्हापेठ पोलीस ठाण्यात अज्ञात व्यक्तीविरोधात फसवणूकीचा गुन्हा दाखल करण्यात आला आहे.
जळगाव शहरातील निर्मल प्रभू देसाई हे जिल्हा परिषदेतून सेवानिवृत्त झाले आहे. १५ ऑगस्ट रोजी त्यांच्या मोबाईलवर एका अनोळखी व्यक्तीने संपर्क साधला. त्या वेळी त्यांना ‘तुम्ही कोणते क्रेडीट कार्ड वापरता ?’ अशी विचारणा केली. त्यानंतर एका खासगी बँकेच्या क्रेडीट कार्डची माहिती देत त्यावर चांगली ऑफर असल्याचे सांगितले. त्यावर विश्वास ठेवत दोन कार्ड वापरण्यापेक्षा एका नामांकीत कंपनीचे कार्ड मिळत असल्याने ते वापरू या विचाराने त्या सेवानिवृत्त कर्मचाऱ्यानेही विश्वास ठेवला. संपर्क साधणाऱ्याने सेवानिवृत्तास लिंक पाठविण्यासह एक ॲप डाऊनलोड करण्यास सांगितले. ॲप डाऊनलोड केल्यानंतर ओटीपी व इतर कोणतीही माहिती दिली नाही तरी समोरील व्यक्तीला या निवृत्ताच्या मोबाईलमधील सर्व माहिती दिसू लागली. एकप्रकारे त्याने मोबाईलचा ताबा घेत निवृत्ताच्या खात्यातून दोन लाख ७८ हजार ८८५ रुपये काढून घेतले.हा प्रकार घडल्यानंतर सेवानिवृत्त कर्मचारी यांनी जिल्हापेठ पोलीस ठाण्यात धाव घेवून तक्रार दिली आहे. त्यानुसार जिल्हापेठ पोलीस ठाण्यात गुन्हा दाखल करण्यात आला आहे. पुढील तपास महिला पोलीस कॉन्स्टेबल वंदना चव्हाण हे करीत आहे.
