जळगाव (प्रतिनिधी) जळगाव जिल्हा बॅंकेवर महाविकास आघाडी प्रणित सहकार पॅनलने आपला झेंडा फडकवला आहे. यात उमेदवार डॉ. सतीश पाटील, गुलाबराव देवकर व अँड. रोहिणी खडसे विजयी झाल्या आहेत. दरम्यान, विद्यमान अध्यक्षा रोहिणी खडसे यांनी अपेक्षेनुसार विजय संपादन करून दुसऱ्यांदा जिल्हा बँकेत प्रवेश केला आहे.
अशी आहेत मते
इतर संस्था मतदार संघात सहकार पॅनलचे माजी मंत्री गुलाबराव देवकर विजयी झाले आहेत. त्यांना १५०१ मते मिळाली, इतर मागासवर्ग मतदार संघात सहकार पॅनलचे माजी मंत्री डॉ. सतीश पाटील विजयी झाले. त्यांना २३१६ मते मिळाली. त्यांचे विरोधी विकास पवार यांना २४२मते मिळाली, अनुसूचित जाती जमाती मतदार संघातून सहकार पॅनल चे श्यामकांत सोनवणे विजयी झाले आहेत. त्यांना २४६४ मते मिळाली. व्ही.जे एन.टी मतदार संघात सहकार पॅनलचे मेहताब सिंग नाईक विजयी झाले. त्यांना २३२८ मते पडली. महिला राखीव मतदार संघात सहकार पॅनलचे उमदेवार विद्यमान चेअरमन अँड. रोहिणी खडसे व शैलजा निकम विजयी झाल्या आहेत. खडसे यांना २२३५ मते मिळाली तर निकम यांना १९२५ मते मिळाली आहेत.
चार विविध कार्यकारी सोसायटी मतदार संघात सहकार पँनेल विजयी
जळगाव जिल्हा बँक संचालक निवडणुकीचे आज मतमोजणी सुरू आहे. चार विविध कार्यकारी सोसायटी मतदार संघात महाविकास आघाडी प्रणित सहकार पँनेल विजयी झाले. रावेर विविध कार्यकारी सोसायटी मतदार संघात सहकार पॅनल मधील उमेदवार जनाबाई गोंड महाजन यांनी जाहीर माघार घेऊन अपक्ष उमेदवार माजी आमदार अरुण पाटील यांना पाठिंबा दिला होता. मात्र उलटफेर होवून माघार घेतलेल्या सहकार पॅनल मधील जनाबाई महाजन या एका मताने विजयी झाल्या. त्यांना २६ मते मिळाली तर अरुण पांडुरंग पाटील यांना २५ मते मिळाली.
