मेहुणबारे ता. चाळीसगाव (प्रतिनिधी) पिलखोड येथील जळगाव जिल्हा बँक शाखेत तब्बल १ कोटी ५१ लाख ७५ हजार रुपयात फसवणूक केल्याचा प्रकार जिल्हा बँकेच्या सतर्कतेमुळे उघडकीस आला आहे. या प्रकरणी तत्कालीन बँक शाखा व्यवस्थापकासह वनविभागाच्या अधिकाऱ्यांविरुद्ध मेहुणबारे पोलिसात गुन्हा दाखल करण्यात आल्यामुळे एकच खळबळ उडाली आहे.
या संदर्भात लक्ष्मण देवराम पाटील (वय ५८ धंदा नोकरी रा. द्रोपदी नगर,जळगाव) यांनी मेहुणबारे पोलिसात फिर्याद दिली आहे. त्यात त्यांनी म्हटले आहे की, दि.१ जुलै २०१९ ते दि.१५ नोव्हेंबर २०२२ या कालावधीत जळगाव जिल्हा मध्यवर्ती सहकारी बँक लि. जळगाव शाखा पिलखोड ता. चाळीसगाव येथे विशाल रावसाहेब देशमुख (तत्कालीन शाखा व्यवस्थापक पिलखोड ता. चाळीसगाव, हल्ली तात्पुरते निलंबित) यांनी प्रशासन, व्यवस्थापन विभागाने त्यांना दिलेल्या अधिकाराचा गैरवापर व दुरुपयोग करुन रविंद्र विश्वास पाटील, प्रविण शांताराम पाटील (रा. तामसवाडी ता. चाळीसगाव, फॉरेस्ट विभाग मालेगाव, सटाणा) व दिंडोरी, सामाजिक वनीकरण विभाग येथील तत्कालीन आरएफओ अधिकारी यांच्या सोबत कट कारस्थान व संगनमत करुन बँक शाखेत बनावट व खोटया सहया असलेले विड्रॉल स्लिपाव्दारे रक्कमा काढल्या आहेत.
शाखा व्यवस्थापक विशाल रावसाहेब देशमुख यांना सदरच्या विड्रॉल स्लिपवरील सहया या बनावट व खोटया असल्याचे माहिती असून सुध्दा त्या खऱ्या आहेत, असे भासवून खऱ्या असल्याचे व्यवहारात वापर केलेला आहे. तसेच सदर बनावट सहया केलेल्या विड्रॉल स्लिपा या बँकेतून परस्पर गहाळ करून पुरावा नष्ट केलेला आहे. तसेच शेतकरी पिककर्ज भरणा रक्कमेत अपहार करुन त्यात बँकेच्या खात्यातून रक्कमा काढून त्या बँकेच्या वरीष्ठ कार्यालयाच्या लक्षात येवू नये म्हणून बँक शाखेचा खोटा हिशोब ठेवला आहे.
दि. १ जुलै २०१९ ते १५ नोव्हेंबर २०२२ या कालावधीमध्ये चौकशी अहवालातील रकमा वर्गवारीने जमा नावे करून रोखीने काढून गैरहेतूने गैरव्यवहार करुन बँकेची दिशाभूल करुन वेगवेगळया व्यवहारात एकुण रक्कम रुपये १ कोटी ५१ लाख ७५ हजार ४८२ रुपये रकमेचा अपहार केलेला आहे. तसेच याच कालावधीत शाखेचे अंतर्गत शाखा परिक्षण करणारे अधिकारी वसंत पुंडलीक पाटील यांनी पिलखोड शाखेची अंतर्गत तपासणी करतांना त्यांनी शाखेतील कोणत्याही प्रकारची दस्ताऐवजाची परिक्षण न करता तसेच वरील प्रकरणांकडे मुदाम दुर्लक्ष करून शाखेची अंतर्गत तपासणी अहवाला कोणत्याही प्रकारची त्रुटया व शक अहवालात दर्शविला नाही.
या प्रकरणी विशाल रावसाहेब देशमुख (रा. देशमुखवाडी ता. चाळीसगाव), रविंद्र विश्वास पाटील, प्रविण शांताराम पाटील, तत्कालीन RFO, फॉरेस्ट विभाग मालेगाव, तत्कालीन RFO, फॉरेस्ट विभाग सटाणा, तत्कालीन RFO, फॉरेस्ट विभाग दिंडोरी, तत्कालीन RFO सामाजिक वनीकरण विभाग (नाव माहित नाही) यांच्याविरुद्ध विविध गंभीर कलमान्वये गुन्हा दाखल करण्यात आला असून पुढील तपास आर्थिक गुन्हे शाखेचे पो.उप निरी. सुदाम काकडे हे करीत आहेत. दरम्यान, सूत्रांनी दिलेल्या माहिती नुसार वन विभागात अशा प्रकारचा अपहार जिल्ह्यासह राज्यभर सुरु असल्याची शक्यता वर्तविण्यात येत आहे.
