जळगाव (प्रतिनिधी) शिवाजीनगर परिसरातील राजमालती नगरातील महिलेच्या घरातील सव्वापाच लाख रुपयांचे सोन्याचे दागिने लंपास झाले होते. या प्रकरणाची तक्रार नोंदवायला मालकिणीसोबत आलेल्या मोलकरीण महिलेनेच हे दागिने चोरल्याची बाब समोर आली असून, पोलिसांनी तिच्याकडून दागिने हस्तगत केले आहेत.
शहरातील मालतीनगरात सुरत रेल्वे गेटजवळ सुनीता नरेंद्र मोरे (वय ४८) राहतात. मुलगा भुसावळ येथे कामास आहे. त्यामुळे सुनीता मोरे या एकट्याच घरी असतात. त्यामुळे त्यांनी घरातील धुणी-भांडीसाठी स्वाती किशोर कांबळे (रा. राजमालतीनगर ) हिला कामावर ठेवले होते. दरम्यान १ ते १६ एप्रिल दरम्यान सुनीता मोरे यांच्या घरात त्यांनी पितळी डब्यात ठेवलेले सोन्याची पोत, अंगठ्या, कानातील असे ५ लाख ३२ हजार रुपयांचे दागिने चोरीला गेल्याचे त्यांच्या लक्षात आले. त्यामुळे दुसऱ्याच दिवशी तक्रार करण्यासाठी सुनीता मोरे ह्या मोलकरीण स्वाती हिला सोबत घेऊन शहर पोलिस ठाण्यात गेल्या.
पोलिसांनी कोणावर संशय म्हणून त्यांनी सुरुवातीला त्यांचा मुलगा बऱ्याचदा दारूच्या नशेत असतो. त्यामुळे त्याने दागिने चोरले असण्याची शक्यता वर्तवली. पोलिसांनी खाक्या दाखवल्यावर त्याने मी दारू पितो, हे खरे असले तरी मी चोरी केलेली नसल्याचे स्पष्ट सांगितले. त्यानंतर सुनीता यांनी स्वातीबाबत संशय व्यक्त केला. तिला व तिच्या पतीला वेगवेगळी विचारपूस केल्यानंतर स्वातीने स्वतःच्या घरातून १० ग्रॅम वजनाची सोन्याची पोत काढून दिली. तसेच काही अंगठ्या शहरातील नंदुरबारकर सराफ यांच्याकडे मोडल्याची कबुली दिली. पोलिसांनी संबंधित सोनाराकडे जाऊन ११ ग्रॅम वजनाचे दागिन्यांची मोड असे २१ ग्रॅम सोने अवघ्या २४ तासांत हस्तगत केले. या प्रकरणी पोलिस निरीक्षक विजयकुमार ठाकूरवाड यांच्या मार्गदर्शनाखाली एपीआय रवींद्र बागुल हे तपास करत आहेत.
