जळगाव (प्रतिनिधी) कामावरून दुचाकीने घरी जात असलेल्या एका सुरक्षा रक्षकाला भरधाव अज्ञात वाहनाने धडक दिल्याने मृत्यू झाला. करतार तोताराम पवार (वय ४८ रा. मांडवे दिगर ता. भुसावळ ह.मु. कुसुंबा), असे मयताचे नाव आहे. ही घटना सोमवारी रात्रीच्या सुमारास कुसुंबा गावाजवळ घडली. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
भुसावळ तालुक्यातील मांडवे दिगर येथील करतार पवार हे कामासाठी कुसुंबा येथे स्थायिक झाले आहे. याठिकाणी ते पत्नी आणि तीन मुलांसह राहत होते. एमआयडीसीतील मकरा एजन्सी येथे सुरक्षा रक्षक म्हणून नोकरीला होते. नेहमीप्रमाणे सोमवार दि. १५ जानेवारी रोजी रात्री १० वाजता कामावरून घरी जाण्यासाठी दुचाकीने निघाले. कुसुंबा गावाच्या काही अंतरावरून येत असतांना त्यांच्या दुचाकीला अज्ञात वाहनाने जोरदार धडक दिली. या धडकेत करतार पवार यांचा जागीच मृत्यू झाला. या घटनेची माहिती मिळाल्यानंतर नातेवाईक आणि पोलीसांनी घटनास्थळी धाव घेतली. मृतदेह शासकीय वैद्यकीय महाविद्यालयात दाखल करण्यात आला. वैद्यकीय अधिकारी डॉ. नम्रता अच्छा यांनी तपासणीअंती मयत घोषीत केले.
याबाबत एमआयडीसी पोलीस ठाण्यात अकस्मात मृत्यूची नोंद करण्यात आली आहे. त्यांच्या पश्चात पत्नी निर्मलाबाई, दोन मुले संभाजी, ईश्वर आणि मुलगी भारती असा परिवार आहे. चालक वाहन घेवून पसार भरधाव वेगाने जात असलेल्या वाहनाने दुचाकीस्वार करतार पवार यांना धडक दिल्यानंतर वाहन चालक वाहन घेवून पसार झाला. पोलिसांकडून वाहनाचा शोध घेतला जात आहे.
