जळगाव (प्रतिनिधी) शिवसेनेच्या महाप्रबोधन यात्रेतील वक्ते शरद विठ्ठल कोळी (रा. अर्धनारी, ता. माहोळ, जि. सोलापूर) यांना ताब्यात घेण्याच्या कारणावरून जळगावात गुरुवारी ठाकरे गट व पोलीस शाब्दिक चकमक उडाली. यावेळी पोलीस ठाण्यातच घोषणाबाजी सुरु झाल्यामुळे मोठ्या गोंधळाचे वातावरण निर्माण झाले होते.
सुषमा अंधारे यांच्या महाप्रबोधन यात्रेत धरणगावात युवा सेनेचे विस्तारक शरद कोळी यांनी पालकमंत्री गुलाबराव पाटील यांच्याविषयी वादग्रस्त व प्रक्षोभक भाषण केल्याच्या तक्रारीनंतर जिल्हाधिकारी अमित मित्तल यांनी शरद कोळी यांना जिल्ह्यात भाषण करण्यावर बंदी घातली होती. तर दुसरीकडे धरणगावात त्यांच्याविरुद्ध गुन्हा दाखल करण्यात आला आहे. पोलीस दडपशाहीने कामकाज करीत असल्याचा आरोप करुन शिवसेनेचे जिल्हा संपर्क प्रमुख संजय सावंत, सुषमा अंधारे, सहसंपर्क प्रमुख गुलाबराव वाघ, जिल्हा प्रमुख विष्णू भंगाळे, महापौर जयश्री महाजन, महानगरप्रमुख शरद तायडे, मनपाचे विरोधी पक्षनेते सुनील महाजन, धरणगावचे माजी लोकनियुक्त नगराध्यक्ष निलेशभाऊ चौधरी, गजानन मालपुरे यांच्यासह शिवसैनिक शरद कोळी यांच्यासोबत हॉटेल ते शहर पोलीस ठाणे चालत आले. रस्त्यावर पोलीस व सरकारविरोधात जोरदार घोषणाबाजी करत होते. यामुळे काही वेळ प्रचंड तणावाचे वातावरण निर्माण झाले होते.
