जामनेर (प्रतिनिधी) सहा वर्षाची चिमुकली घरात एकटी असल्याचे पाहून तसेच तुला खाऊ घेऊन देतो, असे आमिष दाखवत सुभाष उमाजी भील (वय ३५) नराधमाने या चिमुकलीला गावा शेजारीच असलेल्या शेतात नेत तिचा निर्घृण खून केला. ही खळबळजनक जामनेर तालुक्यातील केकतनिंभोरा शिवारातील चिचखेडे बुद्रुक गावाजवळ दि. ११ रोजी सायंकाळी ७ वाजेच्या सुमारास उघडकीस आली. या घटनेमुळे परिसरात खळबळ उडाली असून संशयित पसार झाला आहे.
केळीच्या शेतात आढळली मृत अवस्थेत !
जामनेर तालुक्यातील केकतनिंभोरा शिवारातील चिंचखेडे बुद्रुक येथील गावठाण हद्दीत काही आदिवासी कुटुंबीय राहतात. ते मोलमजुरी करून आपला उदरनिर्वाह चालवतात. दरम्यान, सध्या पेरणीचे दिवस असल्याने आपल्या सहा वर्षीय मुलीला घरी सोडून तिचे आई वडील कामानिमित्त बाहेर गेले होते. आई, वडील कामावरून घरी परतले, तेव्हा आपली मुलगी घरात नसल्याचे पाहून त्यांनी तिच्याविषयी शेजाऱ्यांना विचारले. परंतु, काहिही माहिती मिळाली नसल्याने त्यांच्यासह तिच्या नातेवाईकांनी या बालिकेचा सर्वत्र शोध सुरू केला. या वेळी ही मुलगी गावा शेजारील केळीच्या शेतात मृत अवस्थेत आढळून आली. मृत बालिकेवर अत्याचार केल्याचा संशय आहे.
दरम्यान, घटनेची माहिती मिळताच जामनेर पोलीस ठाण्यातील पो.नि. किरण शिंदे यांनी आपल्या सहकाऱ्यांसोबत घटनास्थळी धाव घेऊन घटनेची माहिती जाणून घेतली. त्यानंतर चिमुकलीचा मृतदेह ताब्यात घेऊन शवविच्छेदनासाठी तो जळगाव येथे पाठवला. तर जिल्हा पोलीस अधीक्षक डॉ. महेश्वर रेड्डी यांच्यासह वरिष्ठ पोलीस अधिकाऱ्यांनी घटनास्थळी भेट देऊन पाहणी करून योग्य त्या सूचना दिल्या आहेत.
आरोपीला फाशीची शिक्षा देण्याची मागणी !
या प्रकरणी मयत मुलीच्या वडीलांच्या फिर्यादीवरून जामनेर तालुक्यातील के कतनिंभोरा येथील सुभाष उमाजी भील (वय ३५) या संशयिताविरुद्ध जामनेर पोलीस ठाण्यात गुन्हा दाखल करण्यात आला आहे. या घटनेचा पुढील तपास पो.नि. किरण शिंदे करत आहेत. दरम्यान, संशयित आरोपी फरार झाला असून त्याला शोधण्यासाठी पोलिसांचे पथक तयार करण्यात आल आहेत. पोलीस त्याचा कसून शोध घेत आहेत. विकृती असलेल्या या संशयित आरोपीला त्वरीत अटक करून फाशीची शिक्षा द्यावी, अशी मागणी यावेळी करण्यात आली. चिमुकलीचा मृतदेह जळगावात आल्यामुळे जिल्हा शासकीय वैद्यकीय महाविद्यालय व रुग्णालयात तणावाचे वातावरण निर्माण झाले होते. यावेळी पोलिसांचा मोठा बंदोबस्त याठिकाणी तैनात करण्यात आला होता.
