जामनेर (प्रतिनिधी) दारु पिण्यासाठी पैसेन दिल्याने मुलाने बाजीराव राजाराम पवार (वय ५५) यांची धारदार शस्त्राने वार करीत हत्या केली, ही धक्कादायक घटना दि. १६ रोजी दुपारी चार वाजेच्या सुमारास पळासखेडा बुद्रुक येथे घडली. संशियत मारेकरी सुमित पवार हा स्वतःहून पोलिसात हजर झाला असून त्याच्याविरुद्ध खुनाचा गुन्हा दाखल करण्यात आला आहे.
हातातील चाकूने वडीलांच्या मानेवर वार !
जामनेर तालुक्यातील पळासखेडा बुद्रुक येथील लिला नगरात बाजीराव पवार हे कुटुंबियांसह वास्तव्यास होते. खासगी नोकरी करुन ते कुटुंबाचा उदनिर्वाह करीत होते. त्यांचा मुलगा सुमित हा दारुच्या आहारी गेला होता. गुरुवारी दुपारी चार वाजेच्या सुमारास बाजीराव पवार यांची पत्नी व मुलगी बाहेर गेलेल्या होत्या. त्यावेळी सुमित याने वडीलांकडे दारु पिण्यासाठी पैसे मागितले. परंतु त्याच्या वडीलांनी पैसे देण्यास नकार दिल्याने त्याने वडीलांसोबत वाद घातला. त्यांच्यातील वाद विकोपाला गेल्याने सुमितने हातातील चाकूने वडीलांच्या मानेवर वार केले. यामध्ये बाजीराव पवार हे गंभीर जखमी होवून खाली कोसळले.
ग्रामस्थांच्या मदतीने केले रुग्णालयात दाखल
वादामध्ये सुमितकडून वडीलांवर वार होवून ते गंभीर जखमी झाल्याने त्याने ग्रामस्थांच्या मदतीने त्यांना ताक्काळ जामनेर येथील उपजिल्हा रुग्णालयात दाखल केले. याठिकाणी वैद्यकीय अधिकाऱ्यांनी तपासणी करीत बाजीराव पवार यांना मयत घोषीत केले. त्यांच्या पश्चात पत्नी, दोन मुल, मुलगी असा परिवार आहे.
मुलाविरुद्ध गुन्हा दाखल
दारुच्या नशेत वडीलांची हत्या झाल्याचे कळताच सुमित बाजीराव पवार हा स्वतः पोलिस ठाण्यात हजर झाला. यावेळी त्याच्याविरुद्ध जामनेर पोलीस स्टेशनमध्ये खुनाचा गुन्हा दाखल करण्यात आला आहे. पुढील तपास पोलीस उपनिरीक्षक दिपक रोठे करीत आहेत
