अकोला (वृत्तसंस्था) जावयाने सासूची हत्या (Mother in Law Murder) केल्याची धक्कादायक घटना उघडकीस आली आहे. जावईबापूंनी आपल्या ६० वर्षीय सासूला विहिरीत फेकल्याचं समोर आलं आहे. ६० फूट खोल विहिरीत पडल्यामुळे सासूबाईंचा मृत्यू झाला. अकोला (Akola Crime) जिल्हातल्या बाळापूर तालुक्यातल्या वाडेगावमध्ये हा प्रकार घडला.
वाडेगाव येथील शेत शिवारामधील ढोरे यांच्या शेतात रखावली करिता वास्तव्यास असलेल्या परिवारातील ६० वर्षीय मजूर महिलेला जावयाने मारहाण करून विहिरीत ढकलून तिची हत्या केल्याची धक्कादायक घटना सोमवारी (७ फेब्रुवारी) रात्री १० वाजेच्या सुमारास घडली आहे. बाळापूर पोलिसांनी दिलेल्या माहितीनुसार वाडेगाव येथील शेतकरी ढोरे यांच्या शेतात जावाई व सासू यांचा काही कारणावरुन वाद झाला होता. यावेळी जावयाने थेट आपल्या सासूलाच मारहाण केली. हा सगळा वाद प्रचंड विकोपाला गेला. ज्यामध्ये जावई विलास इंगळे याने आपल्या ६० वर्षीय सासू चंद्रकला दाखोरे हिला ६० फूट खोल विहिरीत फेकून दिलं.
ही घटना घडत असताना आरोपीचा दोन ते तीन वर्षांचा मुलगा घाबरून तिथून पळून गेला. त्यामुळे त्याचा जीव वाचला. ही घटना सोमवार रोजी रात्री घडली होती. ज्याबाबत आज सकाळी गावकऱ्यांना माहिती मिळाली. ही माहिती मिळताच गावकऱ्यांनी तात्काळ पोलिसांना याबाबत कळवलं. या घटनेबाबत स्थानिक शेतकरी यांनी माहिती दिली त्यानुसार ८ फेब्रुवारी रोजी सकाळी बाळापूर पोलीस स्टेशन ठाणेदार घुगे यांच्या मार्गदर्शनाखाली पोलीस घटनास्थळी पोहचून मृत महिला चंद्रकला बळीराम दाखोरे यांचा मृतदेह विहिरीतून बाहेर काढून पंचनामा करण्यात आला. या घटनेतील आरोपी विलास मारोती इंगळे (वय ३५ वर्ष) हा अद्याप फरार आहे. पोलिसांनी आरोपीला शोधून काढण्यासाठी वेगवेगळी पथकं तयार केली आहेत. तसेच या प्रकरणाचा अधिक तपास देखील सुरु आहे.
