पटना (वृत्तसंस्था) बिहारची राजधानी पटनामधून अनैतिक संबंधामुळे नात्यांना काळिमा फासणारी एक घटना समोर आली आहे. इथे एक भाचा आपल्या मामीच्या असा काही प्रेमात पडला की, त्याने मामीला मिळवण्यासाठी आपल्या मित्रासोबत मिळून आपल्या मामाची हत्या केली. हे प्रकरण पटनाच्या दिदरगंज फतेहपूर येथील आहे. या प्रकरणाचा खुलासा करत पोलिसांनी गुरुवारी मृत व्यक्तीची पत्नी, भाचा आणि त्याच्या मित्राला अटक केली आहे.
काय आहे संपूर्ण प्रकरण?
फतेहपूर येथे एका अनोळखी व्यक्तीचा मृतदेह आढळून आला होता. पोलीस सतत त्या मृतदेहाची ओळख पटवण्याचा प्रयत्न करत होते. अचानक एके दिवशी दिदारगंज पोलीस ठाण्यात एक व्यक्ती आला आणि मृत व्यक्तीचा फोटो पाहून त्याने पोलिसांना सांगितले की हा त्याचा भाऊ आहे. त्यानंतर या प्रकरणाच्या तपासाला गती आली. मृत व्यक्तीचे नाव सूरज असे आहे. यावेळी पोलिसांनी इतर नातेवाइकांनी या घटनेची माहिती दिली आणि त्यांना चौकशीसाठी बोलावलं. तेव्हा काही नातेवाईकांनी पोलिसांना सांगितले की, मृत सूरज हा त्याच्या सासरच्या घरी राहत होता आणि ६ फेब्रुवारीपासून बेपत्ता होता. नातेवाइकांनी पोलिसांना सांगितले की, सूरज हा काही दिवसांपासून खूप अस्वस्थ होता.
पोलिसांनी अशी केली गुन्ह्याची उकल
पाटणाच्या एसएसपींनी याप्रकरणी विशेष टीम तयार करून तपास सुरू केला होता. त्यानंतर जी माहिती समोर आली ती अत्यंत धक्कादायक अशीच होती. एसएसपी मानवजीत सिंह ढिल्लन यांनी दिलेल्या माहितीनुसार, तपासादरम्यान मृत सूरजच्या पत्नीची चौकशी केली असता पोलिसांना तिचा काहीसा संशय आला. त्यामुळे पोलिसांनी तिची कसून चौकशी केली. ज्यानंतर हत्येची संपूर्ण घटना उघडकीस आली.
दरम्यान, नातेवाईकांनी पोलिसांना सांगितले की, चार वर्षांपूर्वी सूरजचा विवाह खानापूर येथील काजलसोबत झाला होता. यादरम्यान दोघांना एक मूलही झाले होते. सगळं व्यवस्थित चाललं होतं. पण शेजारी राहणारा भाचा अनेकदा मामीला भेटायला यायचा. याच कारणावरून सूरज आणि त्याच्या पत्नीमध्ये सातत्याने भांडण व्हायचं.
पोलिसांनी दिलेल्या माहितीनुसार, मामा कामाला निघून गेला की, भाचा आपल्या मामीला भेटण्यासाठी यायचा. याचवेळी दोघांमध्ये अनैतिक संबंधही प्रस्थापित झाले होते. बहुतेक वेळा भाचा हा त्याच्या मामीसोबतच असायचा. यादरम्यान, दोघांनीही एकमेकांशी लग्न करण्याचा निर्णय घेतला. याच दरम्यान सूरज हा अवैध दारूशी संबंधित एका गुन्ह्यात तुरुंगात गेला. त्यामुळे मामी-भाचा अधिकच जवळ आले होते.
तुरुंगातून आल्यानंतर सूरजला पत्नीच्या अनैतिक संबंधाची मिळाली माहिती
सूरज जामिनावर तुरुंगातून बाहेर आला आणि त्याला पत्नीचे आपल्याच भाच्यासोबत असलेल्या अनैतिक संबंधांबाबत माहिती मिळाली. याच गोष्टीला सूरजने प्रचंड विरोध केला. जेव्हा हा सगळा प्रकार भाच्याला (आकाश) समजला तेव्हा आकाशने त्याचा मित्र अजित याच्यासोबत मामाच्याच हत्येचा कट रचला.
७ फेब्रुवारी रोजी आकाशने मामा सूरज याला त्याचा मित्र अजित याच्या टेम्पोमध्ये बसवले. यावेळी तिघेही भरपूर दारू प्यायले. यावेळी त्यांनी नियोजनानुसार सूरजला आणखी दारू पाजली. दारू पिऊन सूरज बेशुद्ध झाल्यानंतर आकाशने धारदार शस्त्राने त्याचा गळा चिरला आणि त्याचा मृतदेह फतेहपूर येथे फेकून दिला. यावेळी पोलिसांनी हत्येत वापरलेला चाकू जप्त केला असून अटक करण्यात आलेल्या आरोपी मामी, भाचा आकाश आणि त्याच्या मित्राची कारागृहात रवानगी केली आहे.
