बीड (वृत्तसंस्था) येथील जिल्हा सहनिबंधक कार्यालयातील कनिष्ठ लिपीकाला जमीन नावची करण्यासाठी पावती व हुकूमनामा प्रमाणित करुन देण्यासाठी ९०० रुपयांची लाच स्विकारताना सोमवारी लाच लुचपत प्रतिबंधक विभागाने रंगेहात पकडले आहे. विनोद गिरीधर मुनेश्वर (३२) असे लाचखोर लिपीकाचे नाव आहे.
तक्रारदार यांच्या आईच्या नावावरील जमीन तक्रारदार यांच्या नावे करण्याचा आदेश गेवराई येथील न्यायालयाने दिला होता. यासाठी बीड येथील जिल्हा सहनिबंधक कार्यालयातील कनिष्ठ लिपीक विनोद मुनेश्वर याने तक्रारदारांना पावती आणि हुकूमनामा प्रमाणित करून देण्यासाठी शासकीय फिस ६०० रुपये आणि १०० रुपये लाच अशी एकूण १५०० रुपयांची रक्कम मागितली होती. परंतू तक्रारदाराची लाच देण्याची इच्छा नव्हती. त्यामुळे त्यांनी याबाबत एसीबीकडे तक्रार केली.
एसीबीच्या पथकाने लाच मागितल्याबाबत पंचासमक्ष पडताळणी केली आणि त्यानंतर सापळा रचला. त्यानुसार सोमवारी मुनेश्वर याला १५०० रुपये घेताना एसीबीच्या पथकाने रंगेहाथ पकडले. एसीबीचे उपअधीक्षक शंकर शिंदे, कर्मचारी भारत गारदे, हनुमान गोरे, अविनाश गवळी, संतोष राठोड, गणेश म्हेत्रे यांनी ही कारवाई केली. शिवाजीनगर पोलिसांत गुन्हा नोंद करण्यात आला आहे.
