जळगाव (प्रतिनिधी) निमखेडी शिवारात असलेली रुद्र गृहनिर्माण सहकारी संस्थेमधील सदनिका खरेदी करण्यासाठी उपनिबंधक कार्यालयाकडून ना-हरकत दाखला देण्याच्या मोबदल्यात ४ हजाराची लाच मागणाऱ्या कनिष्ठ लिपिकाला अटक करण्यात आली आहे. लाचलुचपत विभागाने ही कारवाई केली आहे.
यासंदर्भात अधिक असे की, ४६ वर्षीय तक्रारदार यांना निमखेडी शिवारात असलेली रुद्र गृहनिर्माण सहकारी संस्थेमधील सदनिका खरेदी करणार असल्याने सदर सदनिका खरेदीकामी त्यांना उपनिबंधक कार्यालयाकडून ना-हरकत दाखला/संमती पत्र देण्याच्या मोबदल्यात कनिष्ठ लिपिक विनोद रमेश सोनवणे (वय-४६ रा. रिधुर वाडा, शनीपेठ) यांनी पंचासमक्ष तक्रारदार यांचेकडे प्रथम ५ हजार रुपये लाचेची मागणी केली. तसेच तडजोडीअंती ४ हजार रुपये लाचेची मागणी केल्याप्रकरणी लाचलुचपत विभागाने त्यांना ताब्यात घेतले आहे. लाचखोर विनोद सोनवणे यांच्याविरोधात रामानंदनगर पोलीस स्थानकात गुन्हा दाखल करण्यात आला आहे.
यांनी केली कारवाई
ही कारवाई अपर पोलीस अधीक्षक सतीश डी.भामरे, पोलीस उप अधीक्षक शशिकांत श्रीराम पाटील यांच्या मार्गदर्शनाखाली पोलीस निरीक्षक संजोग बच्छाव, पोलीस अंमलदार दिनेशसिंग पाटील, सुरेश पाटील, अशोक अहीरे, सुनिल पाटील, रविंद्र घुगे, शैला धनगर, मनोज जोशी, सुनिल शिरसाठ, जनार्धन चौधरी, प्रविण पाटील, महेश सोमवंशी, नासिर देशमुख, ईश्वर धनगर, प्रदिप पोळ यांनी केली.
