खंडवा (वृत्तसंस्था) जिल्ह्यातील मंधाता विधानसभा मतदारसंघात भाजपाच्या एका उमेदवारासाठी प्रचारसभा ठेवण्यात आली होती. परंतू याठिकाणी शेतकऱ्याचा मृत्यू झाल्यानंतरही ज्योतिरादित्यांनी भाषण सुरु ठेवल्याने त्यांच्यावर जोरदार टीकेची झोड उठली आहे.
खंडवा जिल्ह्यातील मंधाता विधानसभा मतदारसंघात भाजपाच्या एका उमेदवारासाठी प्रचारसभा ठेवण्यात आली होती. त्याचा प्रचार करण्यासाठी शिंदे गेले होते. शिंदे येण्यापूर्वी स्थानिक नेत्यांची भाषणे चालू होती. दरम्यान, पंढना येथील भाजपचे आमदार राम डांगोरे भाषण देत होते, त्यावेळी ८० वर्षीय शेतकरी जीवनसिंग यांचा अचानक मृत्यू झाला. शेतकऱ्याचा मृत्यू होताच आजुबाजुच्या खुर्च्यांवर बसलेल्या लोकांमध्ये गोंधळ उडाला. तरीही नेत्यांचे भाषण थांबले नाही. दरम्यान, काँग्रेसने व्हिडीओ पोस्ट करून शेतकऱ्याचा भर सभेत मृत्यू झाला तरीही सभा पुढे सुरु का ठेवली, असा सवाल विचारला आहे. तसेच शेतकऱ्याच्या मृतदेहासमोर बेशरम भाजपा टाळ्या वाजवत राहिली, अशी टीका केली आहे. शिंदे घटनास्थळी पोहोचले तोपर्यंत शेतकऱ्याचा मृतदेह सभास्थळापासून नेण्यात आला होता. जेव्हा शिंदे यांना याची माहिती मिळाली तेव्हा त्यांनी त्या शेतकऱ्याला श्रद्धांजली दिली आणि एक मिनिटाचे मौन ठेवले. यानंतर भाषण सुरु केल्यामुळे काँग्रेसने यावर टीका केली आहे.
