जळगाव (प्रतिनिधी) स्थानिक गुन्हे शाखेचे पोलीस निरीक्षक बापू रोहम यांची नियंत्रण कक्षात बदली करण्यात आली आहे. कायदा व सुव्यवस्था तसेच बंदोबस्ताच्या दृष्टीने ही बदली करण्यात आल्याचे कारण आदेशात नमूद केले असले तरी, चाळीसगाव तालुक्यातील मेहुणबारे येथे पकडलेला गुटख्याचा ट्रक जळगाव येथे आणल्याचे प्रकरण बदलीचे मुख्य कारण असल्याचे बोलले जात आहे. याप्रकरणी पोलिस अधीक्षक डॉ.मुंढे यांनी काही दिवस आधीच एपीआय सचिन बेंद्रे यांच्यासह सात पोलीस कर्मचाऱ्यांना निलंबित केले आहे.
नेमकं काय आहे प्रकरण
मेहुनबारे पोलिस स्थानकाच्या हद्दीत स्थानिक गुन्हे शाखेच्या पथकाने गुटख्याने भरलेला ट्रक पकडला होता. परंतु स्थानिक ठिकाणी फिर्याद न देता तो ट्रक थेट जळगाव येथे आणला जात होता. याची माहिती आमदार मंगेश चव्हाण यांना मिळाल्यानंतर त्यांनी रात्रभर ट्रकचा पाठलाग केला आणि जळगाव शहरालगत असलेल्या जैन व्हॅली जवळ तो ट्रक पकडला. यावेळी साधारण तासभर आमदार चव्हाण यांचा पोलिसांसोबत वाद झाला. यानंतर हा ट्रक जिल्हापेठ पोलिस ठाण्यात आणण्यात आला. यावेळी आमदार चव्हाण यांनी माझी फिर्याद घ्यावी असा आग्रह धरला. यावरून पुन्हा एकदा आमदार चव्हाण आणि पोलिसांमध्ये खडाजंगी झाली. दरम्यान आमदार चव्हाण यांनी यासंदर्भात संपूर्ण घटनाक्रम विशेष पोलीस महानिरीक्षक श्री दिघावकर व पोलीस अधीक्षक डॉक्टर मुंढे यांना दिली. यानंतर दुपारी त्यांनी पत्रकार परिषद घेऊन पोलिसांवर मोठ्या प्रमाणात ताशेरे ओढत या प्रकरणात गुटखा ट्रक मालकांशी स्थानिक गुन्हे शाखेच्या कर्मचाऱ्यांच्या लागेबांधे असल्याचा गंभीर आरोप केला. दरम्यान या ट्रकमध्ये साधारण ६७ लाखाचा गुटखा आढळून आला होता.
यांचे झालेय निलंबन
या प्रकरणाची चौकशी करण्याचे आदेश देण्यात आले होते . अखेर काल रात्री पोलीस अधीक्षक डॉक्टर मुंडे यांनी निलंबनाचे आदेश काढले. निलंबित कर्मचाऱ्यांमध्ये सपोनि सचिन बेंद्रे स्थानिक गुन्हे शाखेचे रामचंद्र बोरसे, नारायण पाटील, मनोज दुसाने यांच्यासह इतर कर्मचाऱ्यांचा समावेश आहे.
किरणकुमार बकाले यांच्याकडे एलसीबीचा पदभार
जिल्ह्यातील पोलिस निरीक्षक, सहायक पोलिस निरीक्षक, उपनिरीक्षक अशा १७ पोलिस अधिकाऱ्यांच्या बदल्यांचे आदेश मध्यरात्री जिल्हा पोलिस अधीक्षक डॉ. प्रवीण मुंढे यांनी काढले. जळगाव एलसीबीचे पो.नि. बापू रोहोम यांची नियंत्रण कक्षात बदली झाली आहे. आदेशात कायदा व सुव्यवस्था तसेच बंदोबस्ताच्या दृष्टीने ही बदली करण्यात आल्याचे कारण त्यात नमूद करण्यात आले आहे. तर एलसीबीचा प्रभारी पदभार सध्या किरणकुमार बकाले यांना देण्यात आला आहे.
