कोपरगाव (वृत्तसंस्था) जेवण करण्यासाठी जात असताना कोपरगाव तालुका पोलीस ठाण्यात कार्यरत असलेल्या पोलीस नाईका यांना चालू मोटार सायकलवर हृदय विकाराच्या झटक्याने मृत्यू झाल्याची घटना बुधवारी रात्री घडली आहे. राजू तुकाराम चव्हाण (44) असे या मृत पोलिसाचे नाव आहे.
राजू चव्हाण कोपरगाव तालुका पोलिस स्टेशनला नोकरीस असून मुळ (रा. घुमटवाडी, ता. पाथर्डी) येथील रहिवाशी आहेत. बुधवारी रात्री ८.१५ वाजेच्या सुमारास पोलिस नाईक राजू चव्हाण व मामा प्रेमदास तारू पवार (वय ४५, रा. बागलुज, ता. आष्टी, जि. बीड) हे मोटारसायकलवरून जात होते. पोलीस नाईक चव्हाण यांनी मामाला गाडीवरून खाली उतरवले व दोन मिनिटात येतो, असे सांगून मोटारसायकल पुन्हा पाठीमागे वळवून घेऊन जात असताना हृदयविकाराचा झटका आला. त्यामुळे चव्हाण हे मोटरसायकलसह खाली पडले. ही घटना शहरातील नवश्या गणपती मंदिर व स्वामी समर्थ केंद्रासमोर, रोडवर, कोपरगाव येथे घडली. चव्हाण यांना हॉस्पिटलमध्ये नेण्यात आले. चव्हाण यांना डॉ. मुळे हॉस्पिटल येथे नेले असता तेथील डॉक्टरांनी त्यांना मृत घोषित केले. कोपरगाव शहर पोलिस ठाण्यात रात्री उशिरा अकस्मात मृत्यूची नोंद करण्यात आली आहे. दरम्यान, पोलीस कर्मचारी राजू चव्हाण यांच्या अकस्मात निधनाने सर्वत्र हळहळ व्यक्त होत आहे. स्व. चव्हाण यांच्या मागे आई, पत्नी, दोन मुले असा परिवार आहे.
