नागपूर (वृत्तसंस्था) आरोपींनी बंगळुरू येथील एका गरीब कुटुंबाकडून बारा वर्षीय मुलीला खरेदी करून नागपुरात आणले. तिच्याकडून बळजबरीने काम करून घेत असताना लैंगिक शोषणही सुरु केले. एवढेच नव्हे तर, तिच्या गुप्तांगाला सिगारेटचे चटके देखील द्यायचे. याप्रकरणी पोलिसांनी तीन आरोपींना बंगळुरू विमानतळावरून अटक केली आहे. तहा अरमान इश्ताक अहमद खान (३९), पत्नी हिना (२६) आणि मेहुणा अजहर (२५), अशी आरोपींची नावे आहेत.
कुटुंबाला ५० हजार मुलीला विकत घेतले !
मानवी क्रौर्याची सीमा ओलांडणारी ही घटना बेसा-पिपळा रोडवरील अथर्व नगरीत घडली. बेसा-पिपळा रोडवरील अथर्व नगरी-३ येथील रो हाउस क्रमांक १९ मध्ये तहा अरमान खान हा पत्नी हिना, दोन मुली आणि मेहुणा अजहरसोबत राहतो. तो रियल इस्टेटचा व्यवसाय करतो. खान कुटुंब हे मूळचे बंगळुरूमधील आहेत. कोरोनाकाळात बंगळुरूला खान कुटुंब गेले असता हिनाच्या घराजवळ राहणाऱ्या एका गरीब दाम्पत्याला गाठले. घरी काम करण्यासाठी मुलगी हवी असल्याचे सांगितले. त्या दाम्पत्याला ७ मुली असून कोरोनामुळे आर्थिक स्थिती खालावल्याने त्यांनी मुलीला खान कुटुंबीयांना देण्याचे ठरविले. तहा अरमानने त्या कुटुंबाला ५० हजार रुपये दिले आणि मुलीला २०२१ मध्ये नागपुरात आणले. खान कुटुंबाने तिला विकत आणल्याचे सांगून घरातील कामे करायची असल्याचे बजावले.
अनैसर्गिक संबंधही ठेवायचे !
तहा अरमान, हिना आणि अजहर हे तिघेही तिच्याकडून घरातील सर्व काम करून घेत होते. तिच्याकडून काही चुका झाल्यानंतर हिना तिला बेदम मारहाण करीत होती. तसेच गरम सराट्याने तिला चटके देत होती. दरम्यान, तहा अरमान आणि अझहर या दोघांची १२ वर्षांच्या मुलीवर वाईट नजर पडली. दोघांनीही तिचे लैंगिक शोषण सुरू केले. दोघेही तिच्याशी बळजबरी शारीरिक संबंध आणि अनैसर्गिक संबंध ठेवत होते.
तीन वर्षांपासून सुरू होते शोषण !
खान कुटुंब पीडितेला बाथरूममध्ये डांबून घराला कुलूप लावून बाहेरगावी निघून जात होते. तिला खायला काही ब्रेड देण्यात येत होते. तिच्यावर सलग तीन वर्षांपासून सुरू असलेल्या अत्याचारामुळे मुलगी भेदरली होती. मुलीच्या वैद्यकीय तपासणीदरम्यान तिच्या अंगावरील जखमा बघून डॉक्टरांचेही मन द्रवले. सध्या या मुलीला महिला सुधारगृहात ठेवण्यात आले आहे.
मुलीने खिडकीतून हात बाहेर काढले अन् प्रकरण उघडकीस !
आरोपी कुटुंबीय बाहेर जाताना मुलीला बाथरूममध्ये डांबून ठेवायचे. घराला कुलूप लावून निघून जात होते. त्यामुळे मुलीला कोणालाही आपबिती सांगता येत नव्हती. शेजाऱ्यांना या गोष्टीची कल्पना नव्हती. एक दिवस मुलीने बाथरूमच्या खिडकीतून हात बाहेर काढून शेजाऱ्यांना आपबिती सांगण्याचा प्रयत्न केला. मुलीसोबत काहीतरी विपरीत घडत असल्याचा शेजाऱ्यांना संशय आल्याने त्यांनी पोलिसांना माहिती दिली. पोलिसांनी प्रकरणाची गंभीर दखल घेत मुलीला आरोपींच्या घरातून ताब्यात घेतले. त्यानंतर तिची वैद्यकीय तपासणी केली असता हे धक्कादायक प्रकरण उघडकीस आले.
