पारोळा (प्रतिनिधी) लग्नाचे आमिष दाखवत तरुणीसोबत प्रेमसंबंध निर्माण केले. मंगळसुत्र घालून सेल्फी देखील काढला. नंतर त्याच तरुणीच्या साखरपुड्यात राडा घातल्याप्रकरणी विवाहीत तरुणाविरुद्ध पारोळा पोलिस स्टेशनला विविध कलमानुसार गुन्हा दाखल करण्यात आला आहे.
पारोळा तालुक्यातील एका गावातील तरुणीने दिलेल्या फिर्यादीनुसार तिच्या गावापासून जवळच रहात असलेल्या विवाहीत तरुणाने तिला लग्नाचे आमिष दाखवले. मी माझ्या पत्नीला फारकत देत तुझ्यासोबत लग्न करेन असे संबंधीत तरुणीला त्याने आमिष दाखवले. अगदी तिच्या गळ्यात मंगळसुत्र घालून सेल्फी देखील काढली. नंतर तरुणीचा साखरपुडा असलेल्या दिवशी कार्यक्रम स्थळी गेला आणि मंगळसुत्र घालतांना काढलेला फोटो व्हायरल करण्याची धमकी देत तरुणीसह तिच्या नातेवाईकांना शिवीगाळ केली. तुझे लग्न होऊ देणार नाही अशी धमकी देत राडा घातला.
दुस-या दिवशी पिडीत तरुणी अंगणात झाडू मारत असतांना तो तरुण तिच्याजवळ आला आणि तिचा हात पकडून जवळ ओढले. याचवेळी तिचे नातेवाईक त्याठिकाणी आले. नातेवाईकांनी त्याला खडसावले असता त्यांना शिवीगाळ करत जीवे ठार करण्याची धमकी दिली. याप्रकरणी संबंधित तरूणाविरुद्ध विविध कलमान्वये गुन्हा दाखल करण्यात आला असून पुढील तपास हे.कॉ. सुधीर चौधरी हे करत आहेत.
