फैजपूर ता. यावल (प्रतिनिधी) येथील पूर्णानंद विनायक पाटील उर्फ पूर्णानंद महाराज याच्या विरोधात अल्पवयीन मुलीचा विनयभंग केल्याप्रकरणी काल रात्री पोक्सो कलमाच्या अंतर्गत गुन्हा दाखल करण्यात आला आहे. यामुळे शहरासह परिसरात खळबळ उडाली आहे.
याबाबत अधिक माहिती अशी की, फैजपूर येथील पूर्णानंद विनायक पाटील उर्फ पूर्णानंद महाराज नावाच्या धार्मिक क्षेत्रात कार्यरत असणार्या विवाहीत व्यक्तीने मंगळवारी एका अल्पवयीन मुलीची छेड काढली. या मुलीच्या आजोबाच्या दुचाकीच्या विक्रीबाबत हा माणूस गेला असता त्याने मुलीचा विनयभंग केला. तिने तात्काळ याबाबत आपल्या कुटुंबियांना माहिती दिल्यानंतर त्याला चोप देऊन पोलीसांच्या स्वाधीन करण्यात आले. याअनुषंगाने संबंधीत अल्पवयीन मुलीच्या पालकांच्या फिर्यादीवरून व भुसावळ येथील महिला पोलीस अधिकार्याच्या उपस्थितीत रात्री उशीरा याप्रकरणी गुन्हा दाखल करण्यात आला.
पूर्णानंद पाटील उर्फ पूर्णानंद महाराज हा परिसरात प्रवचनकार म्हणून ख्यात आहे. दरम्यान दोन वर्षांपूर्वी पूर्णानंदांनी येवला येथे प्रवचन केले होते. त्यादरम्यान तेथील मुलीसोबत प्रेम विवाह केला. घरात सुंदर सुशील पत्नी असूनही पूर्णानंद महाराजांचे असे चाळे सुरू असल्याने संताप व्यक्त केला जात होता. मात्र काल झालेल्या घटनेने त्यांना पोलिसांनी अटक करून त्यांना कोठडीत ठेवले आहे. आज त्यांना भुसावळ न्यायालयात हजर केले जाणार असल्याचे पोलिसांनी सांगितले. घटनेचा तपास सहाय्यक पोलीस निरीक्षक प्रकाश वानखडे यांचे मार्गदर्शनाखाली पोलीस उपनिरीक्षक रोहिदास ठोंबरे तपास करीत आहे.
