भुसावळ (प्रतिनिधी) तालुक्यातील वरणगावमध्ये महाविकास आघाडीने पुकारलेल्या महाराष्ट्र बंदला गालबोट लागले आहे. वरणगाव शहरामध्ये महाविकास आघाडी व भाजपचे कार्यकर्ते आमने सामने आल्याचं चित्र पहायला मिळालं. यावेळी दोन्ही बाजूच्या कार्यकर्त्यांना केलेल्या तुफान हाणामारीमध्ये अनेकजण जखमी असून हॉस्पिटलमध्ये दाखल करण्यात आले आहे.
भुसावळ तालुक्यातील वरणगाव येथे विकास आघाडीच्यावतीने आज बंद पुकारण्यात आला होता या बंदला महा विकास आघाडीचे कार्यकर्ते शांततेत पाळण्याचे आवाहन करत असताना भारतीय जनता पार्टीचे माजी नगराध्यक्ष सुनील काळे बंद पाळू नका असे आवाहन करत होते, दोन्ही पक्षाचे कार्यकर्ते समोरासमोर आल्याने राडा झाला व कार्यकर्त्यांमध्ये हाणामारी झाली त्यामुळे दोन्ही पक्षाचे कार्यकर्ते आता हॉस्पिटलमध्ये दाखल आहेत.
दरम्यान, या संदर्भात दोन्ही बाजूंनी एकमेकांवर आरोप केले आहेत. राष्ट्रवादीचे जिल्हा उपाध्यक्ष तथा गटनेते राजेंद्र चौधरी यांनी आपल्या कार्यकर्त्यांनी सुनील काळे यांना मारहाण केली नसून हा आगामी निवडणुकीसाठी स्टंट असल्याचा आरोप केला आहे. शिवसेनेचे पदाधिकारी नितीन देशमुख यांनी देखील अशा प्रकारचा हल्ला झाला नसून हा केवळ बोलचालीचा प्रकार घडला आहे. या प्रकारामुळे दीपक मराठे यांचा रक्तदाब वाढला असून महेश सोनवणे यांची सोन्याची चेन गायब झाल्याचा आरोप त्यांनी केला आहे.
भाजपचे पदाधिकारी गजानन वंजारी यांनी सुनील काळे यांच्यावर सुमारे १०० जणांचा जमाव चाल करून आल्याचा आरोप केला. यातील राष्ट्रवादीच्या सुमारे ३-३५ जणांनी त्यांच्यावर हल्ला चढविल्याने ते जखमी झाल्याचा आरोप केला आहे. तर, भाजपचे शहराध्यक्ष सुनील माळी यांनी जमावाने सुनील काळे, डॉ. साजीद आणि शंकर पवार यांना बेदम मारहाण केल्याचा आरोप केला. हा नियोजीत प्लॅन असल्याचा आरोप त्यांनी केला. दरम्यान, पोलिसांनी घटनास्थळी धाव घेतली असून यामुळे परिसरात प्रचंड खळबळ उडाली आहे.
