छत्रपती संभाजीनगर (वृत्तसंस्था) विद्युत मीटर बसवून देण्यासाठी ५ हजार रुपये लाच मागणाऱ्या व ती स्वीकारणाऱ्या महावितरणचा प्रधान तंत्रज्ञ शेख रफिक शेख मोहंमद (४२, रा. बायजीपुरा) याला लाचलुचपत प्रतिबंधक विभागाने पकडले. विशेष म्हणजे त्याला संशय आल्याने, त्याने खिशातून लाचेची रक्कम काढत फेकून दिली होती.
वाळूज औद्योगिक वसाहतीत सिमेंट ब्लॉक बसविण्याचा व्यवसाय करणाऱ्या ३९ वर्षीय व्यक्तीने साजापूर येथे व्यवसायासाठी रिकामा प्लॉट भाडेतत्वावर घेतला आहे. तिथे व्यावसायिक वीज कनेक्शनसाठी त्यांनी अर्ज केला होता. कनेक्शन लावून देण्यासाठी ते वाळूज एमआयडीसीतील महावितरणच्या कार्यालयात गेले होते. तिथे शेख रफिक याने त्यांना ७ हजार रुपयांची लाच मागितली. तडजोडीअंती ५ हजार रुपये देण्याचे ठरले. त्यांनी लाचलुचपत प्रतिबंधक विभागाकडे तक्रार केली. पथकाने सापळा रचून १ मे रोजी दुपारी बारा ते सव्वा वाजेदरम्यान शेख याला लाच घेताना पकडले. त्याने दोन पंचासमक्ष लाच घेतल्याप्रकरणी एमआयडीसी वाळूज पोलीस ठाण्यात गुन्हा दाखल करण्यात आला आहे.
