तामसा (जि. नांदेड) आईला त्रास देत असल्याच्या कारणावरुन दिवट्या मुलाने बापाच्या छातीत आणि डोक्यात जात्याचा दगड घालून निघृण खून केल्याची घटना मंगळवार दि. ३० एप्रिल रोजी रात्री ९.३० वाजेच्या सुमारास तामसा परिसरात घडली. मधुकर मारोतराव तुपेकर (वय ४८ रा. मौजे चिकाळा ता. हदगाव जि. नांदेड) असे मयताचे नाव आहे.
हदगाव तालुक्यातील तामसा परिसरात मौजे चिकाळा गाव आहे. या गावात मधुकर मारोतराव तुपेकर (वय ४८) व त्याचा मुलगा दत्ता यांच्यात नेहमी वारंवार वाद होत असे. मंगळवार दि. ३० एप्रिल रोजी मधुकर तुपेकर यांनी गावातील चावडीवर मुलगा दत्ता याला बसलेले पाहिले आणि त्याला दगड फेकून मारला. त्यानंतर दत्ता तेथून पळून गेला. थोड्या वेळाने मधुकर घरी गेला. त्याने दारुच्या नशेत पत्नीला मारहाण सुरु केली. इतक्यात दता घरी आला आणि आपले वडील आईला त्रास देत असल्याचे मारहाण करत असल्याचे त्यानेपाहीले. वडील आईला मारहाण करत असल्याचे पाहिल्यानंतर त्याचा राग अनावर झाला आणि रागाच्या भरात त्याने वडिल मधुकर यांच्या छातीत आणि डोक्यात जात्याचा दगड घातला.
या घटनेत मधुकर जागीच रक्तबंबाळ होऊन मरण पावला. ही घटना मंगळवार दि. ३० एप्रिल रोजी रात्री ९.३० वाजेच्या सुमारास घडली. ही घटना मधुकरचा भाऊ दिलीप तुपेकर यांना समजली. त्यांनी लगेच तामसा पोलिसांना सदर घटनेची माहिती दिली. या खुनाचे वृत्त कळताच पोलिसांनी घटनेचे गांभीर्य ओळखून घटनास्थळ गाठले आणि मारेकरी दत्ताला ताब्यात घेतले. मयताचा भाऊ दिलीप तुपेकर यांनी दिलेल्या फिर्यादीवरून तामसा ठाण्यात आरोपी दत्ता मधुकर तुपेकर (वय २३, रा. मौजे चिकाळा ता. हदगाव जि. नांदेड) याच्याविरुध्द गुन्हा दाखल केला आणि अटक केली. त्याला बुधवार दि. १ मे रोजी हदगावच्या प्रथम न्याय दंडाधिकारी यांच्यासमोर हजर केले असता १ दिवसाची पोलिस कोठडी मिळाली. ही मुदत दि. २ मे रोजी संपल्याने आरोपी दत्ताची रवानगी कारागृहात करण्यात आली. पुढील तपास सपोनी शिवराम तुगावे करीत आहेत.
