अहमदाबाद (वृत्तसंस्था) देशाचे संरक्षण दल प्रमुख जनरल बिपीन रावत यांच्या निधनाबाबत सोशल मीडियावर एका व्यक्तीने आक्षेपार्ह पोस्ट टाकल्याचे उघडकीस आले आहे. याप्रकरणी गुजरात पोलिसांनी गुन्हा दाखल केला असून संबंधित व्यक्तीला अटक केली आहे.
तामिळनाडूतील कुन्नूर येथे बुधवारी भारतीय हवाई दलाचे हेलिकॉप्टर कोसळून झालेल्या भीषण दुर्घटनेत संरक्षण दल प्रमुख बिपीन रावत, त्यांची पत्नी मधुलिका रावत, स्टाफमधील वरिष्ठ अधिकारी, अन्य सुरक्षा अधिकारी आणि क्रू मेंबर्स अशा एकूण १३ जणांचा मृत्यू झाला. या घटनेने अवघा देश स्तब्ध झाला आहे. बिपीन रावत यांचे अपघाती निधन हा देशासाठी खूप मोठा आघात आहे. अशावेळी या अपघाताबाबत सोशल मीडियावर एक आक्षेपार्ह पोस्ट लिहिण्यात आल्याने मोठी खळबळ उडाली. या पोस्टवर तीव्र संताप व्यक्त केला गेला. त्यानंतर पोलिसांनी याबाबत कठोर पावले उचलली आहेत.
गुजरातमधील शीवाभाई अहीर नावाच्या व्यक्तीने हे कृत्य केले आहे. अहीर याने बिपीन रावत यांच्या हेलिकॉप्टरला झालेल्या दुर्घटनेबाबत पोस्ट लिहिताना त्यात राष्ट्रीय सुरक्षा सल्लागार अजित डोवल आणि दिवंगत मनोहर पर्रिकर यांच्याबद्दल आक्षेपार्ह मजकूर लिहिला होता. याप्रकरणी अहीर याच्याविरुद्ध गुन्हा दाखल करत सायबर क्राइम ब्रांचने अहीर याला अटक केली आहे. त्याला अमरेली येथून अटक करण्यात आल्याचे अहमदाबादचे पोलीस उपायुक्त (सायबर क्राइम) अमित वसावा यांनी सांगितले.
