चोपडा (प्रतिनिधी) सोशल मीडियाच्या माध्यमांतून धार्मिक आणि जातीय भावना दुखावून दोन समाजांत तेढ निर्माण होतील असं स्टेटस, व्हिडिओ क्लिप्स, आक्षेपार्ह मजकूर, एसएमएस तयार करून प्रसारित करणाऱ्या विरोधात चोपडा पोलीस सात्यत्याने कारवाई करत आहेत. एवढेच नव्हे तर चोपडा पोलिसांनी ‘सोशल मीडिया पेट्रोलिंग’ सुरु केली आहे.
चोपडा शहर पोलीस निरीक्षक के.के. पाटील यांनी सोशल मीडियात एक पोस्ट व्हायरल केली आहे. त्यानुसार चोपडा शहर व तालुक्यातील सर्व जाती धर्माच्या नागरिकांना, सर्व विद्यार्थी व इतरांना त्यांनी आवाहन केले आहे की, कुणाच्याही धार्मिक भावना दुखावल्या जातील अशा प्रकारचे आक्षेपार्ह फोटो व्हिडीओ व्हाट्स अँपवर स्टेटस म्हणून ठेवू नये, ते इंस्टाग्राम, फेसबुक व इतर सोशल मीडिया वर व्हायरल करू नये किंवा लाईक करू नये. अशा प्रकारचे कृत्य करणाऱ्या आरोपी विरुद्ध एका महिन्यात ४ गुन्हे दाखल करण्यात आलेले आहेत.
पोलिसांच्या वतीने सोशल मीडियावर विशेष लक्ष ठेवण्यात येत आहे. तरी भविष्यात देखील अशा प्रकारचे कृत्य करणाऱ्या लोकांविरुद्ध कठोर कारवाई करण्यात येणार आहे. त्यामुळे दोन भिन्न जाती-धर्मामध्ये तेढ निर्माण होईल व सार्वजनिक शांततेचा भंग होईल, अशा प्रकारचे गैर कृत्य कोणीही करू नये अन्यथा आपणास कठोर कारवाईस सामोरे जावे लागेल. अशा बेजाबदार कृत्यामुळे कायदा व सुव्यवस्थेचा प्रश्न निर्माण झाल्यास सर्वस्वी संबंधित व्यक्तीला जबाबदार धरण्यात येईल, असेही म्हटले आहे.
