रावेर (प्रतिनिधी) तालुक्यातील अटवाडे येथे महिला बचत गटांकडून कर्जवसुली करून परतत असलेल्या एका खासगी बँकेच्या प्रतिनिधीला रस्त्यात अडवत मारहाण करून त्यांच्याकडील रोकड लुटल्याप्रकरणी दोन अज्ञात व्यक्तींविरुद्ध गुन्हा दाखल करण्यात आला आहे.
अटवाडे ते मोरगाव रस्त्यावरील नाल्याच्या पुलाजवळ गुरुवारी दुपारी २च्या सुमारास ही घटना घडली. लुटारूंनी डोळ्यात मिरचीपूड फेकत मारहाणही केली आहे. याप्रकरणी रावेर पोलिसांत गुन्हा दाखल झाला आहे. ग्रामीण भागातील महिला बचतगटांना पतपुरवठा करणाऱ्या एका खासगी बँकेतील कर्जवसुली प्रतिनिधी आकाश अनिल पाटील (वय ३०, रा. जुना सावदारोड, पाण्याच्या टाकीजवळ, रावेर) हे अटवाडे येथे गेले होते. बचत गटांकडून कर्जहप्त्याची वसुली करून ते मोरगावकडे जात होते. त्यांची दुचाकी वाटेत २५ व ३० वर्षे वयोगटातील दोघा मास्कधारी लुटारूंनी अडवली. पाटील यांना मारहाण करत डोळ्यात मिरचीपूड फेकून ६७ हजार १४३ रुपयांची रोकड नेत पोबारा केला. या हल्ल्यात पाटील जखमी झाले असून पुढील तपास पोलिस उपनिरीक्षक विशाल सोनवणे हे करीत आहेत.
