जामनेर (प्रतिनिधी) जिल्हा बँक निवडणुकीसाठी शनिवारी आमदार गिरीश महाजन यांच्या निवासस्थानी मुक्ताईनगरचे आमदार चंद्रकांत पाटील यांच्यासह अनेक आजी-माजी आमदार, जिल्हा परिषद सदस्यांची बैठक झाली. यावेळी जिल्हा बँक निवडणुकीसह विविध राजकीय विषयांवर चर्चा झाल्याचे कळते.
जिल्हा बँकेच्या निवडणुकीसाठी राजकीय हालचालींना वेग आला आहे. या बैठकीला भाजपचे जिल्हाध्यक्ष तथा आमदार सुरेश भोळे, आमदार चंदुलाल पटेल, मुक्ताईनगरचे आमदार चंद्रकांत पाटील, माजी आमदार स्मिता वाघ, माजी जिल्हा परिषद अध्यक्ष दिलीप खोडपे, जिल्हा परिषद अध्यक्षांचे पती प्रल्हाद पाटील, माजी उपाध्यक्ष नंदू महाजन, समाजकल्याण सभापती जयपाल बोदडे, जिल्हा परिषद सदस्य नंदू महाजन, मुक्ताईनगरचे नगरसेवक पियुष मोरे, रावेरचे सुरेश धनके, तालुकाध्यक्ष चंद्रकांत बाविस्कर यांच्यासह तालुक्यातील अनेक पदाधिकारी महाजनांच्या निवासस्थानी उपस्थित होते.
आगामी जिल्हा बँक निवडणुकीच्या पार्श्वभूमीवर सध्या जिल्ह्यातील वातावरण ढवळून निघत आहे. त्याचबरोबर जिल्हा परिषद निवडणुकांसाठी गट रचना आरक्षण याबाबतही उत्सुकता आहे. एकंदरीत सध्याची परिस्थिती व शनिवारी आमदार महाजन यांच्या निवासस्थानी जमलेली आमदार, पदाधिकाऱ्यांची मांदियाळी पाहता जिल्हा भाजपची राजकीय सूत्रे आमदार महाजनांकडूनच हलवली जात आहे.
