जळगाव (प्रतिनिधी) जिल्हा दूध संघाच्या अध्यक्षपदी भाजप आमदार मंगेश चव्हाण यांची निवड झाल्यानंतर त्यांनी पदभार स्वीकारला आहे. यावेळी कॅबिनमधील एकनाथराव खडसे यांचा फोटो हटवण्यात आल्याची राजकीय वर्तुळात मोठी चर्चा आहे.
अध्यक्षपदी अधिकृत निवड झाल्याची घोषणा झाल्यानंतर मंगेश चव्हाण यांनी पालकमंत्री गुलाबराव पाटील व गिरीश महाजन यांच्या उपस्थितीत अध्यक्ष पदाचा पदभार स्वीकारला. यावेळी अध्यक्ष कॅबिनमध्ये असलेला एकनाथराव खडसे यांचा फोटो हटवण्यात आला. जळगाव जिल्हा दूध संघावर गेल्या सात वर्षांपासून खडसे यांचे एकहाती वर्चस्व होतं. मात्र, नुकत्याच झालेल्या निवडणुकीत खडसे यांची सत्ता संपुष्टात आली. दरम्यान, कॅबीनमधील खडसे यांचा फोटो हटविण्यात आल्यामुळे पहिल्याच दिवसापासून आमदार मंगेश चव्हाण यांनी आपली अध्यक्षपदाची सुरुवात आक्रमकरित्या केल्याचे दिसून आले. आमदार मंगेश चव्हाण यांनी आपला चाळीसगाव मतदार संघ सोडून थेट खडसे यांना त्यांच्या मुक्ताईनगर मतदार संघात आव्हान दिले होते. एवढेच नव्हे तर चांगल्या मतांनी विजय देखील संपादन केला.
