जळगाव (प्रतिनिधी) प्रदेश काँग्रेस कमिटीच्या उत्तर महाराष्ट्र कार्याध्यक्षा आमदार प्रणिती शिंदे आज जळगाव जिल्ह्याच्या दौऱ्यावर आल्या होत्या. या दौऱ्यात त्यांनी जिल्ह्यातील पक्षसंघटनेचा धावता आढावा घेतला. यावेळी त्यांनी पक्षसंघटन वाढीच्या सूचनाही दिल्या आहेत.
प्रदेश काँग्रेस कमिटीच्या उत्तर महाराष्ट्र कार्याध्यक्षपदी नियुक्ती झाल्यानंतर आमदार प्रणिती शिंदे या उत्तर महाराष्ट्राचा दौरा करत आहेत. नाशिक, मालेगाव येथील आढावा घेतल्यानंतर आज त्या जळगावात दाखल झाल्या. दुपारी १२ वाजताच्या सुमारास अजिंठा विश्रामगृहात त्यांनी जिल्ह्यातील पक्षसंघटनेचा आढावा जाणून घेण्यास सुरुवात केली.
दरम्यान, या दौऱ्यात आमदार शिंदे यांच्यासह काँग्रेसचे नेते, पदाधिकारी तसेच कार्यकर्त्यांनी कोरोनाचे नियम अक्षरशः धाब्यावर बसवले होते. जळगाव जिल्ह्यात कोरोनाचा प्रादुर्भाव मोठ्या प्रमाणावर असताना प्रणिती शिंदे यांनी शहरातील अजिंठा शासकीय विश्रामगृहात कार्यकर्त्यांच्या गर्दीत आढावा बैठका घेतल्या. कोरोनाच्या पार्श्वभूमीवर कडक निर्बंध असतानाही याठिकाणी काँग्रेसच्या कार्यकर्त्यांची जत्रा भरली होती.
आमदार प्रणिती शिंदेंनी विविध ब्लॉक अध्यक्ष, तालुकाध्यक्ष तसेच विविध कार्यकर्त्यांशी वन टू वन चर्चा केली. यावेळी अनेक पदाधिकारी व कार्यकर्त्यांनी एकमेकांवर आरोप-प्रत्यारोप केले. पक्ष संघटनेत गटतट असल्याने पक्षाच्या ताकदीवर परिणाम होत असल्याचा आरोपही काहींनी केला. जळगाव जिल्हा हा एकेकाळी काँग्रेसचा बालेकिल्ला होता. पण नेत्यांनी दुर्लक्ष केल्याने आज पक्ष जिल्ह्यातील अस्तित्त्व टिकवण्यासाठी झगडत आहे. पक्ष संघटनेत अनेक पदे रिक्त आहेत. निष्ठावंत कार्यकर्त्यांना पक्षाने कामाची संधी द्यावी, अशी मागणीही काहींनी केली.
पक्ष संघटनेचा आढावा घेत असताना आमदार प्रणिती शिंदे यांना जळगाव जिल्हा कार्यकारिणीतील अनेक पदे रिक्त असल्याची बाब लक्षात घेऊन आठवडाभरात कार्यकारिणीतील रिक्त पदे भरण्यात येतील. या पदांवर निष्ठावंत कार्यकर्त्यांना संधी दिली जाईल, असे त्यांनी आश्वासन दिले.
