धुळे (प्रतिनिधी) मनसेचे अध्यक्ष राज ठाकरे यांनी केलेल्या आवाहनानुसार धुळे शहरात विविध ठिकाणी मनसे कार्यकर्त्यातर्फे भोंग्यावरून हनुमान चालीसा पठण करण्याची तयारी होती. परंतु, चालिसा पठण करण्यापूर्वीच पोलिसांनी (Police) मनसे कार्यकर्त्यांना ताब्यात घेतले.
मनसेच्यावतीने दिलेल्या भोंगा काढण्याबाबतच्‍या इशारानंतर राज्‍यभरात वातावरण तापले आहे. सकाळपासूनच मनसेचे कार्यकर्ते भोंग्यावरून हनुमान चालिसा पठण करण्याच्‍या तयारीत होते. त्‍यानुसार धुळे शहरात मोठ्या प्रमाणात पोलीस बंदोबस्त लावण्यात आला आहे. धुळे शहरातील विविध ठिकाणाहून मनसे कार्यकर्ते पोलिसांनी ताब्यात घेतले. या विरोधात देखील मनसे कार्यकर्त्यांनी पोलीस प्रशासनाची दडपशाही असल्याचा आरोप केला आहे. तसेच राज्य सरकारच्या विरोधामध्ये मनसे कार्यकर्त्यांनी तीव्र घोषणाबाजी केली.
