जळगाव (प्रतिनिधी) शहरातील पिंप्राळा-हुडको परिसरात एका मुलाने वडीलांशी वाद घालत नंतर आईवरही चाकूने वार केल्याची धक्कादायक घटना मंगळवारी घडली. याप्रकरणी आईच्या फिर्यादीवरून मुलगा देवेंद्र गजानन साळूंखे (वय २२) याच्याविरूध्द रामानंदनगर पोलिस ठाण्यात गुन्हा दाखल करण्यात आला आहे.
या संदर्भात अधिक असे की, आज (मंगळवार) सकाळी ८.३० वाजेच्या सुमारास प्रमिला साळूंखे यांचा मोठा मुलगा देवेंद्र याने वडील गजानान यांच्याकडे सिगारेटसाठी पैसे मागितले. त्यांनी पैसे देण्यास नकार दिला म्हणून त्याने वडीलांशी हुज्जत घालून शिवीगाळ केली. वाद वाढत असल्याचे लक्षात आल्यावर आईने त्याला समजविण्याचा प्रयत्न केला. मात्र, आईला देखील त्याने शिवीगाळ केली. एवढेच नव्हे तर, छोटा चाकूने आईवर वार केला. यात प्रमिलाबाई या खमी होवून खाली कोसळल्या. या घटनेनंतर देवेंद्र हा तेथून पळून गेला. तर प्रमिलाबाई यांना तत्काळ रूग्णालयात उपचारार्थ दाखल करण्यात आले. या प्रकरणी रामानंद पोलिसात गुन्हा दाखल करण्यात आला आहे. दरम्यान, सिगारेटसाठी जन्मदात्या आईवर मुलानेच चाकूने वार केल्यामुळे समाजमन सुन्न झाले आहे.
